2022 წლის 5 თვეში საქართველოდან ექსპორტზე 27,141 ტონა 79,8 მლნ დოლარის ღირებულების ღვინო გავიდა, რაც გასული წლის მონაცემებთან შედარებით 3.7%-ით ნაკლებია. ღვინის ეროვნული სააგენტოს ხელმძღვანელი „ბიზნესპრესნიუსთან“ ამბობს, რომ მიზეზი რეგიონში მიმდინარე ომია.
ლევან მეხუზლას თქმით, ახლა ქვეყანა ბაზრების დივერსიფიცირებაზე მუშაობს, თუმცა ნაკლებ მოსალოდნელია, რომ რაოდენობრივად ექსპორტის დეფიციტის კომპენსირება მოხდეს.
„ექსპორტის შემცირება რიცხვებში თითქოს არც ისე მასშტაბურია, თუმცა რაოდენობრივად, ნამდვილად გვაქვს დანაკლისი. ფაქტობრივად, უკრაინა გასაგები მიზეზების გამო წლის პირველ ნახევარში გაჩერებული იყო. ახლა, შედარებით დაიწყო ისევ შესყიდვები, მაგრამ 60%-ზე მეტია კლება. ჩვენ ტრადიციულ ბაზრებზე შეინიშნება კლების ტენდენცია, განსაკუთრებით მარტი-აპრილიდან. თუმცა, მაინც მინდა აღვნიშნო, რომ სტრატეგიულ ბარებზე (ევროკავშირი, აშშ, დიდი ბრიტანეთი) ყველა ამ ბაზარზე ზრდა შენარჩუნებულია და ვფიქრობ, რომ ეს ტენდენცია გაგრძელდება. თუმცა, რაოდენობა რომ ავიღოთ, ვფიქრობ, ვერ მოხდება ჩანაცვლება, რასაც რეგიონის ქვეყნებში ექსპორტის დეფიციტი ქმნის.
ჩვენ, შეიძლება ითქვას, თუ ქვეყნებით ავიღებთ, სადაც ღვინის მოხმარება ხდება, პრინციპში სრულად ათვისებული. ჩვენ გვაქვს ექსპორტი დახლოებით 60 ქვეყნაში. არის ქვეყნები, რომელიც ღვინისთვის ძალიან კარგი ბაზარია და ყველა ამ ქვეყნაში სტრატეგიულად ვმუშაობთ. არის ქვეყნები, რომელიც რაოდენობის მხრივ თითქოს ნაკლებ საინტერესოა, თუმცა ისინი არიან მაღალ მსყიდველუნარიანი და დივერსიფიცირების კუთხით აუცილებელია მათი ათვისება. ვგულისხმობ ჩრდილო ევროპას, სკანდინავიას და ბენელუქსის ქვეყნებს, სადაც რამდენიმე მცირე, მაგრამ ძალიან წარმატებული ღონისძიება გვქონდა საელჩოებისა და კერძო სექტორის დახმარებით და ჩართულობით. ვფიქრობ, შექმნილ ვითარებაში ეს ბაზრები საინტერესოა. ხაზგასმით ვამბობ, არ გვაქვს ილუზია, რომ მოკლე ვადაში რაოდენობას, რომელიც რეგიონიდან დაგვაკლდა დავაკომპენსირებთ, თუმცა ამაზე უნდა ვიმუშაოთ“, - განაცხადა მეხუზლამ.
მისივე თქმით, გარდა ევროპაში დაგეგმილი კამპანიებისა, აგვისტოს ბოლოს თბილისში, აშშ-ს ღვინის ეკონომისტთა ასოციაცია გამართავს კონგრესს, რაც ქართული ღვინის ცნობადობისთვის ასევე უმნიშვნელოვანესია.
,,გადაწყვეტილება მიღებულია, აგვისტოს ბოლოს გაიმართება საქართველოში აშშ-ს ღვინის ეკონომისტთა ასოციაციის კონგრესი, თბილისში სახელმწიფო უნივერსიტეტის ბაზაზე ჩვენი უშუალო ჩართულობით და მხარდაჭერით. მათი სტატისტიკა ძალიან მნიშვნელოვანია ჩვენთვის, ბოლო მონაცემით, როცა ყველა ქვეყანაში იკლებდა ექსპორტი აშშ-ში მაინც იყო მზარდი. ამით თავისთავად ჩანს, რამდენად მნიშვნელოვანი ბაზარია, მით უფრო, რომ გასულ წელს 1 მლნ ბოთლზე მეტი გავიდა ექსპორტზე. რაოდენობაც უკვე საგრძნობია და საშუალო ფასიც იმატებს“, - განაცხადა მეხუზლამ „ბიზნეპრესნიუსთან“.
ღვინის ეროვნული სააგენტო
