„საქართველოს დისტრიბუტორთა ბიზნეს ასოციაციის“ პრეზიდენტმა ივა ჭყონიამ ბიზნეს ფორმულას ეთერში ქვეყანაში არსებულ ინფლაციაზე ისაუბრა  და აღნიშნა, რომ პროდუქტზე ფასების ზრდის მთავარი ფაქტორი საერთაშორისო ბაზარზე ფასების ცვლილებაა, რადგან საქართველო როგორც იმპორტირებულ პროდუქტზე, ასევე იმპორტირებულ ნედლეულზე არის დამოკიდებული.

„როდესაც ვსაუბრობთ ადგილობრივ წარმოებაზე, იქნება ეს ადგილობრივი ბოსტნეული თუ ხილი, ყველაფერს სჭირდება იმპორტი, საწვავის, პესტიციდების თუ სასუქის სახით. დღეს დიზელზეა დამოკიდებული გადაზიდვები, დისტრიბუცია და მთლიანად სოფლის მეურნეობა.

სოფლის მეურნეობის პროდუქტებზე, იგივე  ბოსტნეულზე დღეს ფასები არის შემცირებული, მაგრამ ეს არამხოლოდ  სეზონურობიდან, არამედ ჭარბი მოსავლიანობიდან გამომდინარეობს,  რაც პირველ რიგში აზარალებს  გლეხებს, რადგან მათ იძულებით მოუწიათ პროდუქციაზე ფასის დაკლება, მაგალითად წელს ჩასაბარებელი საზამთროს ფასი იყო 20-25 თეთრი, შეიძლება  ეს მოსახლეობისთვის კარგია, მაგრამ დამანგრეველია ფერმერისთვის და საბოლოო ჯამში იწვევს უკუჩვენებას“ - აღნიშნა ივა  ჭყონიამ.

ჭყონიას თქმით საგულისხმოა ის ფაქტიც, რომ ევროპას რუსეთის აგრესიიდან გამომდინარე , ძალიან ცივი ზამთარი ელოდება, რადგან  ჯერ კიდევ გაურკვეველია თუ როგორ და რა ტარიფებში მოხდება გაზის მიწოდება. მისივე თქმით თუ ევროპიდან შემოსული და ევროპაში  წარმოებულ პროდუქტებზე ფასი გაიზრდება ეს რა თქმა უნდა საქართველოზეც  ცუდად აისახება.

„საერთაშორისო გადაზიდვებზე ფასი კატასტროფულად დაახლოებით 100-150 % ით არის გაზრდილი , რაც  საერთაშორისო ბაზარზე საწვავის ფასის  ცვალებადობით არის გამოწვეული, გარდა ამისა გაჭიანურებული იყო გადაზიდვის პროცესიც, ეს ყველაფერი კი ინფლაციის  მაჩვენებელზე აისახება, სამწუხაროდ დადებითი მოლოდინები არ მაქვს და არ მგონია, რომ რამდენიმე თვის განმავლობაში ინფლაციის მაჩვენებელი 10% -ს  ჩამოსცდება, მითუმეტეს იმ ვითარებაში, როდესაც უკრაინაში ომი კვლავ აქტიურია“, - აღნიშნა ივა  ჭყონიამ.

საქართველოს დისტრიბუტორთა ბიზნეს ასოციაციის პრეზიდენტმა ინფლაციურ პროცესებში ლარის კურსის ფაქტორზეც ისაუბრა და განმარტა, რომ ლარის სტაბილურობიდან გამომდინარე, კომპანიებმა შეძლეს, რომ რიგ პროდუქტებზე, რომლებზეც  ფასები მზარდი იყო 2-3 თვის მანძილზე  შეენარჩუნებინათ, თუმცა მისივე  თქმით ლარი რომ არასტაბილურია და მიმს მიმართ ნდობა დაბალია ეს ბოლო პერიოდმაც ძალიან კარგად აჩვენა, როდესაც ლარის კურსი 2,70 დან 14-15 პუნქტით გაუარესდა.

„მოლოდინები გვაქვს  რომ  თუ  ლარის 3 - იან ნიშნულს არ მიაღწევს, პროდუქტებზე ფასების შენარჩუნება შესაძლებელი იქნება იმ შემთხვევაში თუ საერთაშორისო ბაზრებზე  ფასების მკვეთრი ცვლილება არ მოხდება. იგივე ზაფხულის  პერიოდში,  როდესაც  ლარმა  საშუალება  მისცა კომპანიებს სწრაფად ბრუნვად პროდუქტებზე  ზეთზე  წიწიბურაზე და ბრინჯზეც  ფასები იყო შემცირებულ რიგმა  კომპანიებმა  რომელსაც  გრძელვადიანად  ვარგისი პროდუქტები  აქვთ  შეძლეს  აქციების ჩატარებაც,  ჩვენ იმედი გვაქვს რომ ლარი სტაბილურობას შეინარჩუნებს, თუმცა როდესაც აქტიური ტურისტული სეზონი გავა  რთული სათქმელია რა იქნება“ -  აღნიშნა ივა  ჭყონიამ.

რაც შეეხება  მსყიდველუნარიანობას ჭყონია ამბობს, რომ ბაზარზე მოთხოვნა საკმაოდ დიფერენცირებული გახდა, მოთხოვნა გაზრდილია, როგორც  ძვირადღირებულ ასევე  იაფ პროდუქტებზე, მისივე  თქმით მცირდება საშუალო ფენაც, თუმცა არა სიმდიდრისკენ. მისივე თქმით ძვირადღირებულ  პროდუქტებზე მოთხოვნა კი არის  გაზრდილი, მაგრამ  არა იმ პროპორციულობით რამდენადაც  იაფზე.  მან ასევე აღნიშნა, რომ ბიზნეს  სექტორში  გაზრდილი ბრუნვაც საქართველოში შემოსულ გაზრდილ ნაკადებს უკავშირდება.

„კომპანიებისთვის ერთის მხრივ კარგია, რომ ბრუნვა გაზრდილია, მაგრამ სექტემბრის  ბოლოს  ოქტომბრის დასაწყისში ჩვენ უფრო  სხვა  სურათს დავინახავთ, უახლოეს  პერიოდში  ჩვენ  რასაც  ვუყურებთ  საერთაშორისო  ბაზარზე არ  შეინიშნება  ფასების  ცვლილება და თუ გაზის  ტარიფიდან გამომდინარე  ევროპაში  რიგ პროდუქტებზე ფასები არ გაიზარდა  ჩვენ  არ  ველოდებით  რომ  ფასები  გაიზრდება.  სამწუხაროდ ჩვენ მაღალი დამოკიდებულება  გვაქვს  რუსეთის  ბაზარზე,  საკმაოდ  დიდი რაოდენობის და მათ  შორის  პირველადი მოხმარების პროდუქტი  რუსეთიდან  შემოდის, ამ  ეტაპზე  სხვა ალტერნატივა  არც  არის, იმიტომ რომ იგივე  პროდუქტი  რაც რუსეთიდან  შემოდის  ამერიკიდან  რომ შემოვიდეს დაახლოებით 3-ჯერ ძვირი დაჯდება. რუსეთზე ძალიან ბევრი  რამეა  დამოკიდებული , მაგალითად ფიქსირებული  ფასი  ზეთზე თუ არის 100$ შეუძლია გახადოს ხუთასი  დოლარი და ა.შ., ამიტომ გრძელვადიანი პროგნოზის გაკეთება რთულია“, - აღნიშნა ივა ჭყონიამ.