თბილისის ზღვის ჰოსპიტლის კრიტიკული მედიცინის დეპარტამენტის ხელმძღვანელი, მარეხ ბექაია მოსახლეობას სახლში დარჩენისკენ მოუწოდებს და ახსენებს, რომ სამედიცინო სფეროს რესურსები შეზღუდულია და კორონავირუსით ინფიცირებულთა რაოდენობის ზრდის შემთხვევაში ექიმები ვეღარ შეძლებენ ყველას მკურნალობას, ვისაც ეს სჭირდება.
„არ მინდა, ის კადრები ჩემს ქვეყანაში ვნახო, რაც იტალიასა და ესპანეთში ხდებოდა“, - უთხრა ექიმმა ჟურნალისტებს.
„დღეს, მთელი მართლმადიდებლური სამყაროსთვის მნიშვნელოვანი დღეა. იმედს ვიტოვებ, რომ ჩვენი მღვდელმთავრები ტაძრიდან ილოცებენ საქართველოსთვის და მთელი მსოფლიოსთვის, მოსახლეობა კი - საკუთარი სახლებიდან. იმედია, რომ ყველა დარჩებით სახლებში. ამ ეტაპისთვის ჩვენი რესურსები საკმარისია ათეულობით პაციენტის მოვლისთვის და მათი მკურნალობისთვის. ჩვენ ვნახეთ მსოფლიოს დიდი ქვეყნების გამოცდილება, რომელსაც ეს დაავადება შეეხო, არ მინდა, ის კადრები ჩემს ქვეყანაში ვნახო, რაც იტალიამ და ესპანეთმა დადეს - სასახლეში მყოფი მიცვალებულების. ყველა მოქალაქეს ვურჩევ, ილოცონ სახლიდან“, - განაცხადა მარეხ ბექაიამ.
18 აპრილის დღის 15:00 საათის მონაცემებით, საქართველოში ახალი კორონავირუსი სულ 385 პაციენტს დაუდასტურდა, მათგან 84 გამოჯანმრთელდა. გარდაიცვალა 3 ადამიანი.
15 აპრილს საპატრიარქოს საზოგადოებასთან ურთიერთობის სამსახურის ხელმძღვანელმა დეკანოზმა ანდრია ჯაღმაიძემ საზოგადოებას გააცნო საპატრიარქოს პოზიცია აღდგომის დღესასწაულის აღნიშვნის საკითხზე.
ტაძრებში მრევლის განაწილების საკითხზე მღვდელი აღნიშნავს, რომ „დიდ ტაძრებში საუბარია 2-მეტრიანი დისტანციის დაცვაზე, პატარა ტაძრებში უნდა იყოს მაქსიმალურად მრევლი ეზოში და შესაბამისი დისტანციის დაცვით. ზოგიერთ ტაძარს, რომელსაც შესაძლებლობა აქვს, რომ წირვა შეასრულოს დილითაც, მან უნდა შეასრულოს დილითაც“.
16 აპრილს მთავრობამ მიიღო გადაწყვეტილება, სრულად აეკრძალა ავტომობილით გადაადგილება 21 აპრილამდე. საპატრიარქოს განცხადებით, ეს შეზღუდვა მართლმადიდებელ მღვდელმსახურებზე არ მოქმედებს, ისინი სპეციალური საშვებით გადაადგილდებიან და სააღდგომო ლიტურგიასაც კომენდანტის საათის დროს ჩვეულებრივ ჩაატარებენ.
რადიო „თავისუფლება“