პრემიერ-მინისტრის ბრალდებიდან 24 საათის შემდეგ, რაც მან იმპორტიორები მაღალი ფასნამატების დაწესებაში და ხალხის ხარჯზე გამდიდრებაში დაადანაშაულა, მასზე კონკრეტული პასუხი არ ყოფილა არც დისტრიბუტორთა და არც რითეილერთა ასოციაციიდან. სწორედ ამ სექტორებს გადის სურსათი ვიდრე ის მომხმარებლის ხელში მოხვდება და სწორედ მათ მიემართებოდა პრემიერის კრიტიკაც.
პრემიერის მიერ გაკეთებულ განცხადების შემდეგ დისტრიბუტორთა პოზიციების დაცვა „საქართველოს დისტრიბუტორთა ბიზნეს ასოციაციამ“ სცადა. ასოციაციის პრეზიდენტმა ივა ჭყონიამ კომერსანტთან საუბრისას განაცხადა, რომ პრემიერი „ალბათ დეტალურ ინფორმაციას არ ფლობს“. მისი თქმით, ფასწარმოქმნაში არა მხოლოდ სადისტრიბუციო, არამედ რითეილ კომპანიების მიერ დამატებული პროცენტებიც მნიშვნელოვან როლს თამაშობს. ივა ჭყონია ამბობს, რომ ის მზადაა ეს დეტალები მთავრობასთან ერთად განიხილოს და აუხსნას, თუ რა იწვევს ამ რაოდენობის ფასნამატს.
„დისტრიბუტორთა ასოციაციისგან“ განსხვავებით, „კომერსანტთან“ დუმილს ინარჩუნებს „რითეილერთა ასოციაცია“, იმ არგუმენტით, რომ მისი წევრები საერთო განცხადების შეთანხმების პროცესში არიან.
„კომერსანტმა“ კონკრეტულ რითეილერებთან დაკავშირებაც სცადა, რომ მათ დამოუკიდებელი პოზიცია დაეფიქსირებინათ, თუმცა ისინი კომენტარისგან თავს იკავებენ.
კომერსანტმა შეძლო აგროჰაბის გენერალურს დირექტორს ლაშა გოცირიძეს დაკავშირებოდა. ლაშა გოცირიძეს ბრალდებების ადრესატად მისი ჰიპერმარკეტი არ მიაჩნია და აცხადებს, რომ ეს კრიტიკა მათ არ ეხებათ.
„ჩვენს შემთხვევაში - ეს ბრალდება „აგროჰაბს“ არნაირად არ ეხება. ეს შემიძლია ძალიან მოკლედ გითხრათ,“— განაცხადა ლაშა გოცირიძემ.