გუშინ ეროვნულმა ბანკმა რეფინანსირების განაკვეთი უცვლელად -11%-ზე დატოვა. ეროვნული ბანკის მონეტარულ პოლიტიკასა და რეფინანსირების განაკვეთის შესახებ საუბრისას „საზოგადოება და ბანკების“ დამფუძნებელმა გიორგი კეპულაძემ რადიო „კომერსანტის“ დილის ეთერში განაცხადა, რომ ორნიშნა ინფლაციის ფონზე სხვა მოლოდინი არც ყოფილა და ეს სავსებით ლეგიტიმური გადაწყვეტილება იყო.

მისი შეფასებით, ტენდენცია ნელ-ნელა ინფლაციის შემცირებისკენ მიდის, მაგრამ საზოგადოებამ არ უნდა წარმოიდგინოს, რომ ამის გამო რაღაცები მნიშვნელოვნად გაიაფდება.

„იმ ფონზე, როცა ჯერ კიდევ მაღალი გვაქვს ინფლაცია, არ იყო მოსალოდნელი, რომ ეროვნული ბანკი მონეტარული პოლიტიკის შერბილებას დაიწყებდა, რადგან ეს გარკვეული სიგნალი იქნებოდა იმისთვის, რომ ინფლაცია დიდხანს არ წამოსულიყო ქვევით.

გეოპოლიტიკური ვითარების და საერთაშორისო ბაზრებზე გაზრდილი ფასების გათვალისწინებით, ეს ლოგიკური გადაწყვეტილება იყო, თუმცა, ტენდენცია ნელ-ნელა ფასების და ინფლაციის შემცირებისკენ მიდის. მსმენელმა არ უნდა წარმოიდგინოს, რომ რაღაცები მნიშვნელოვნად გაიაფდება, უბრალოდ — მეტად არ გაძვირდება. ინფლაციის შემცირება კი საშუალებას მისცემს ეროვნულ ბანკს, რომ უკვე 2023 წლიდან ნელ-ნელა დაიწყოს მონეტარული პოლიტიკის შერბილება და 11%-იანი ნიშნულიდან ქვევით ჩამოვიდეს, რაც საშუალო საპროცენტო განაკვეთებზე ლარში აისახება და მსესხებლებს უფრო დაბალ პროცენტში შეეძლებათ სესხის აღება, ან ყოველთვიური გადასახადი შეუმცირდებათ მათ, ვისაც უკვე აღებული აქვს სესხი. თუმცა, დოლარში და ევროში საპროცენტო განაკვეთების ზრდაა მოსალოდნელი,“ - განაცხადა გიორგი კეპულაძემ.