„ზოგადადაც არ ვარ დარწმუნებული, რომ ანაკლიის პორტის პროექტი საერთოდ საჭიროა, ბოლომდე გააზრებული არ არის. ყველამ იცის რომ ეს არარენტაბელური პროეტია, მაგრამ ახლა ეშინიათ რომ თქვან პროექტი არ ვარგაო, ამიტომ რაღაცეებს იგონებენ. გამოაცხადებენ ტენდერს და არავინ მიიღებს მონაწილეობას, იტყვიან ვეცადეთ მაგრამ აი არ გამოვიდაო“, - ასე აფასებს ეკონომიკის ყოფილი მინისტრი გიორგი ქობულია ანაკლიის ღრმაწყლოვანი პორტის პროექტის ირგვლივ განვითარებულ მოვლენებს.

გიორგი ქობულია „კომერსანტთან“ ინტერვიუში აღნიშნავს, რომ ანაკლიის პორტის პროექტი  საქართველოს სატრანსპორტო დერეფანში გამავალი ტვირთების სიმცირის გამო არ გამოდგება და ის ასევე არარენტაბელურია.

„ძალიან მნიშვნელოვანია საქართველოსთვის, რომ ლოგისტიკური დერეფნები გაიჭრას, მათ შორის ევროპის მიმართულებით, ამისთვის პირველ ეტაპზე, სანამ ანაკლიის პროექტს მივადგებოდეთ, საჭიროა დავაყენოთ ერთი-ორი საკონტეინერო გემი ფოთში რეგულარულ ხაზზე, რაზეც წლებია საუბარი მიმდინარეობს, მაგრამ ესეც კი ვერ გავაკეთეთ. პირველ რიგში,მოსაგვარებელია ლოგისტიკური საკითხები, რადგან საქონელი ვერ შემოგვიტანია და ვერ გაგვიტანია, ამ დროს კი გვინდა რომ პროექტები განვავითაროთ. ვინ განავითარებს იქ წარმოებას სადაც, ლოგისტიკური დერეფნები არ არის აწყობილი? გარდა ამისა, პროექტი საქართველოს სატრანსპორტო დერეფანში გამავალი ტვირთების სიმცირის გამო არ გამოდგება და ის ასევე არარენტაბელურია,  ამიტომ მიმაჩნია, რომ მითუმეტეს ამ სიტუაციაში ანაკლიის პორტის მშენებლობას აზრი არ აქვს, შეიძლება წლების შემდეგ ვიფიქროთ, მაგრამ ახლა არა. ზოგადადაც, არ ვარ დარწმუნებული, რომ ანაკლიის პორტის პროექტი საერთოდ საჭიროა, ბოლომდე გააზრებული არ არის. ყველამ იცის რომ ეს არარენტაბელური პროექტია, მთავრობამაც და კონსორციუმმაც, მაგრამ ახლა ეშინიათ რომ თქვან პროექტი არ გამოდგება, ამიტომ რაღაცეებს იგონებენ. გამოაცხადებენ ტენდერს და არავინ მიიღებს მონაწილეობას, იტყვიან ვეცადეთ მაგრამ აი არ გამოვიდაო“, - აცხადებს გიორგი ქობულია.

შეგახსენებთ, რომ რამდენიმე დღის წინ ანაკლიის პროექტის ყოფილმა ინვესტორმა, რომელთანაც მთავრობამ საინვესტიციო ხელშეკრულება ცალმხრივად გაწყვიტა, პორტის აშენების სურვილი კვლავ გამოთქვა. თუმცა, ეკონომიკის მინისტრმა ნათია თურნავამ განაცხადა, რომ არ არსებობს საფუძველი ანაკლიის კონსორციუმს მთავრობა მერვედ ენდოს. მისივე თქმით, ანაკლიის ღრმაწყლოვან პორტზე მთავრობა ტენდერს ხელახლა გამოაცხადებს, უბრალოდ ეს პროცესი პანდემიამ დროებით შეაფერხა.

ეკონომიკის ყოფილ მინისტრთან გიორგი ქობულიასთან ვრცელ ინტერვიუს „კომერსანტი“ მოგვიანებით შემოგთავაზებთ.

ნინო თამაზაშვილი