პირველი ივნისიდან „შატო მუხრანის“ დასასვენებელი სივრცე, ღვინის ტურები და ღონისძიებები ადგილობრივი მომხმარებლისთვის ხელმისაწვმდომი გახდა.ღვინის ბარი და გასართობ-დასასვენებელი სივრცე „შატო მუხრანი“ ტურისტებისთვის მცხეთის რეგიონის ერთ-ერთი ყველაზე ხშირი და საინტერესო სანახავ ადგილად მიიჩნეოდა. ამჟამად „შატო მუხრანი“ ლოკალურ მომხმარებელზე კონცერტრირდა, ისევე როგორც დარგის ყველა ბიზნესი. ფასდაკლებებითა და სტუმრების შესაძლებლობებზე მორგების მეშვეობით სივრცის მარკეტინგის მენეჯერი თეონა ტალახაძე იმედოვნებს, რომ უცხოელი ტურისტების სიმცირე შესამჩნევი არ იქნება საქმიანობისთვის.

 „არ ველოდით ასეთ აქტიურობას, პირველივე ივნისიდანვე გვყავდა სტუმრები, გუშინ კი ჩვენი სივრცე მთლიანად დაკავებული იყო.  ასე თუ გაგრძელდება, ეს ძალიან დაეხმარება არსებულ მდგომარეობას ბიზნესსა და ეკონომიკაში.  მთავარია, თითოეულმა კომპანიამ შესაბამისი განწყობა შექმნას მომხმარებლისთვის და მოერგოს ადგილობრივ დამსვენებელს“ - აცხადებს  „შატო მუხრანის“ მარკეტინგისა და ბრენდ-მენეჯერი თეონა ტალახაძე.

მისი განცხადებით, გახსნიდან პირველ დღეებში კომპანიას მოსამზადებელი სამუშოები ჰქონდა, რათა მაქსიმალურად დაცული ყოფილიყო უსაფრთხოების კუთხით ყველა  დადგენილი ნორმა. 

„პირველ დღეებში მოსამზადებელი სამუშაოები გვქონდა, რადგან გამოცხადებულზე ადრე მოგვექცა მუშაობის უფლება. მომხმარებელს ვთავაზობთ მათთვის მორგებულ სერვისებს, პაკეტებს, ახალი მენიუც მომზადდა, გვაქვს ბავშვების კუთხეც და გვყავს ანიმატორებიც. უსაფრთხოების კუთხით,  ყველა ღონისძიებას ვატარებთ - სტუმრებს თერმოსკრინინგი უტარდებათ,  ვიცავთ სისუფთავეს და  ყველა რეგულაციას ვითვალისწინებთ. მართალია  უცხოელი სტუმრების  რაოდენობა მინიმუმამდეა დასული, მაგრამ ვიმედოვნებთ, რომ ნელ-ნელა ამ მიმართულებითაც ამუშავდება ტურიზმი და ვნახავთ როგორ განვითარდება მოვლენები.  ეს ის პერიოდია, როცა მომსახურების სფერო  ლოკალურ მომხმარებელზეა ორიენტირებული. უცხოელი ტურისტი რა თქმა უნდა დაგვაკლდება, რადგან ამ სფეროში ყველა ობიექტის შემოსავალს ძირითადად განსაზღვრავდა ჩამოსული ვიზიტორი.  თუმცა ვიმედოვნებთ, რომ ქართველებისგან იქნება მონდომება, რომ ნახონ მეტი ადგილი და დაისვენონ საქართველოში, რაც ამ კრიტიკულ პერიოდში აუცილებელია.“- განმარტავს თეონა ტალახაძე.

„შატო მუხრანის“ მიერ ადგილობრივი დამსვენებლებისთვის შეთავაზებული ღონისძიებების ჩამონათვალშია სხვადასხვა სახის ტურები -  პიკნიკი ღია სივრცეში, ღია რესტორანიც მოქმედებს, საპიკნიკე მენიუ და ველოსიპედების ტური ვენახში.

მარიამ მორგოშია