მიმდინარე წელს საქართველოში რთველის სუბსიდირება ისევ მოხდება და მთავრობა რქაწითელისა და კახური მწვანის სუბსიდირებას მოახდენს, რაზეც ბიუჯეტიდან ჯამში 150 მლნ ლარს დახარჯავს. პრემიერ-მინისტრის მტკიცებით, კილოგრამი რქაწითელის ჯიშის ყურძენი 90 თეთრზე ნაკლები არ ეღირება.

რთველის სუბსიდირებას მეღვინეები განსხვავებულად აფასებენ. ზოგიერთი მათგანი თვლის რომ, წლების განმავლობაში არსებული სახელმწიფო სუბსიდია მეღვინეებს არათანაბარ პირობებში აყენებს და ბაზარს არაჯანსაღს ხდის, ნაწილი კი მიიჩნევს, რომ ყურძნის სუბსიდირება მომგებიანია როგორც ღვინის კომპანიისთვის, ასევე ყურძნის ჩამბარებლისთვის.

„ვფიქრობ, სუბსიდიის ამდენი წლის განმავლობაში გაგრძელება არასწორია, ეს არაჯანსაღია, შესაძლოა გარკვეული პრობლემა რაღაც პერიოდში სახელმწიფო სუბსიდიით მოგვარდეს, მაგრამ არა ყოველთვის“,— ამბობს „თბილღვინოს” ხელმძღვანელი ზურაბ მარგველაშვილი.

„თელავის ღვინის მარნის“ დამფუძნებელი ზურაბ რამაზაშვილი კი აღნიშნავს, რომ წლევანდელი საკმაოდ კარგი მოსავლის შემდეგ, ყურძნის სუბსიდირება მომგებიანია როგორც ღვინის კომპანიისთვის, ასევე ყურძნის ჩამბარებლისთვის.

ღვინის ეროვნული სააგენტოს ცნობით, საქართველოში წელს 250 000 – 300 000 ტონა ყურძნის მოსავალს ელოდებიან. მოსავალის უმეტესობა, 200 000 ტონამდე, თეთრი ყურძენი იქნება, 100 000 ტონა კი წითელი. სააგენტოს ხელმძღვანელის ლევან მეხუზლას თქმით, მიმდინარე წლის 7 თვის მონაცემებით, ღვინის ექსპორტი მნიშვნელოვნად არ არის შემცირებული, რის გამოც საფერავის ჯიშის ყურძნის სუბსიდირებაზე მთავრობამ უარი თქვა. მისი განმარტებით არ არის გამორიცხული, შემდეგ წლებში მთავრობამ სუბსიდირებაზე საერთოდ უარი თქვას.

„ომმა ყველაზე მეტად ბრენდის და საბრენდე სპირტის წარმოება დააზარალა და სწორედ ამიტომ გახდა საჭიროა რქაწითლის ჯიშის ყურძნის სუბსიდირება. თუმცა ზოგადად, მომავალ წელს გარკვეული ცვლილებები იგეგმება. შესაძლოა სახელმწიფო სუბსიდირებიდან საერთოდ გამოვიდეს და ყურძნის ბაზარი თვითკმარი და თვითრეგულირებადი გახდეს“, - ამბობს ლევან მეხუზლა.

მთავრობამ ამ ღვინის სექტორის სუბსიდირება 2008 წელს დაიწყო. ამ გადაწყვეტილების თავდაპირველი მიზანი რუსული ემბარგოს უარყოფითი ზეგალენის შერბილება და მევენახეობისა და მეღვინეობის დარგების წახალისა იყო. 2018 წელს მთავრობამ განაცხადა, რომ 2008 წლის შემდეგ, 2018 იქნებოდა პირველი წელი, როდესაც სახელმწიფო აღარ დაასუბსიდირებდა ყურძნის მოსავალს. თუმცა სახელმწიფო კომპანია აკურას დაევალა რთველი 2018-ის მოსავლის მისაღებად და გადასამუშავებლად საჭირო ღონისძიებების გატარება. აკურას მოუწია იმ ყურძნის შესყიდვა, რაც დარჩა ბაზარზე კერძო კომპანიების შესყიდვების შემდეგ. ამ შესყიდვის განსახორციელებლად შესყიდვების ეროვნულმა სააგენტომ 10 მლნ. ლარის ყურძნის შესყიდვის პროექტი დაამტკიცა. იგივე განმეორდა შემდეგ წლებშიც.