რუსული სამთო გიგანტი ALROSA ბრილიანტებს ფარულად ინდოეთსა და ბელგიაში მას შემდეგ ყიდის, რაც აშშ-ს სანქციების სიაში მოხვდა. ამის შესახებ სააგენტო Bloomberg-ისთვის გახდა ცნობილი.
აღნიშნულია, რომ არაერთი ინდური და ბელგიური კომპანია ყიდულობს რუსულ ბრილიანტს დიდი რაოდენობით ხელსაყრელი პირობებით, შეზღუდვების გვერდის ავლით. საერთო ჯამში, ასეთ ტრანზაქციებს დაახლოებით ათი ფირმა აფორმებს. მათგან ყველაზე დიდია ინდური Kiran Gems და Shree Ramkrishna Exports Pvt.
გამოცემა აღნიშნავს, რომ ქვების წარმოშობის დადგენა თითქმის შეუძლებელია, ისინი ერთნაირი ზომისა და პროდუქციის დამზადებამდე ან ხელახალი გაყიდვამდე შეიძლება შერეული იყოს სხვადასხვა წარმოშობის ბრილიანტებში.
მასალაში ნათქვამია, რომ ინდოეთი არ აპირებს ბრილიანტის ვაჭრობაში ჩართული დაახლოებით მილიონი ადამიანის სამუშაოს შეწყვეტას. ბელგიისთვის ასევე წამგებიანია მიმოქცევის შეწყვეტა, რადგან ძვირფასი ქვების 80 პროცენტი გადის ანტვერპენის პორტში.
მანამდე ცნობილი გახდა, რომ კომპანია ALROSA-მ, რომელსაც მსოფლიო პროდუქციის 27 პროცენტი და რუსული ალმასის წარმოების 95 პროცენტი უკავია, აღადგინა ექსპორტი თითქმის იმ დონეზე, რაც რუსეთის მიერ უკრაინაში საომარი მოქმედებების დაწყებამდე კომპანიას ჰქონდა.
აპრილში კომპანია ევროკავშირის, აშშ-სა და დიდი ბრიტანეთის სანქციების სიაში მოხვდა. გარდა ამისა, აშშ-ს ხელისუფლებამ მთლიანად აკრძალა რუსული ძვირფასი ქვების პირდაპირი იმპორტი. თუმცა, რუსეთიდან სხვა ქვეყნებში გადამუშავებული ბრილიანტების იმპორტი კვლავ დაშვებულია.