წალენჯიხაში  მსოფლიო და ევროპის ერთ-ერთი წამყვანი საფეხბურთო კლუბის „იუვენტუსის“  ბავშვთა აკადემია იწყებს ფუნქციონირებას. იტალიის ქალაქ ტურინში „იუვენტუსის“ სათავო ოფისში კონტრაქტს ხელი წალენჯიხის მხარდამჭერთა ჯგუფის ხელმძღვანელმა, პარტია „ლელოს“ ლიდერმა მამუკა ხაზარაძემ მოაწერა.

საიდან გაჩნდა იტალიური გრანდის წალენჯიხასთან დაკავშირების იდეა და როგორ მოხდა მათი დათანხმება. „კომერსანტი“ დეტალების გარკვევას მამუკა ხაზარაძესთან შეეცადა.

საიდან გაჩნდა „იუვენტუსის“ ფეხბურთის აკადემიის გახსნის იდეა და რატომ „იუვენტუსი“ და ადვილი იყო თუ არა იტალიური მხარის დათანხმება - როგორც მამუკა ხაზარაძე „კომერსანტთან“ საუბრისას ამბობს მთავარი მიზანი და იდეა იყო წალენჯიხაში იმ მიმართულებების განვითარება, რომელიც ხელს შეუწყობს ახალგაზრდების განათლებას და წარმატებული მომავლის შექმნას, ერთ-ერთ ასეთ მიმართულებად მოიაზრება საფეხბურთო აკადემიაც.

„თავდაპირველად ეს იდეა გაჩნდა იქიდან, რომ წალენჯიხაში გვინდოდა იმ მიმართულების განვითარება, რომელიც მოიცავს განათლებას, ახალგაზრდებს, კულტურას. ჩვენ დავიწყეთ IT-ის სკოლით. მერე როცა დავათვალიერე სტადიონი, რომელიც საკმაოდ დიდია, მაგრამ ინფრასტრუქტურა არ არსებობდა, ვიფიქრე რომ კარგი იქნებოდა, რომელიმე ცნობილი ბრენდის შემოყვანა. დავიწყეთ რამდენიმე ცნობილ ევროპულ საფეხბურთო კლუბთან მოლაპარაკება და ბოლოს ხანგრძლივი მოლაპარაკების შედეგად დავარწმუნეთ იუვენტუსი, რომ მათ წალენჯიხაში გაეხსნათ ბავშვთა აკადემია, ეს საკმაოდ რთული იყო, რადგან მათთვის პრიორიტეტი დედაქალაქებია. საბედნიეროდ მოვახერხეთ,“- აღნიშნა მამუკა ხაზარაძემ.

მამუკა ხაზარაძის თქმით, იტალიური მხარის მოთხოვნა, პირველ რიგში ინფრასტრუქტურის მოწესრიგება იყო, ასევე პირობები გულისხმობს დაზღვევასაც 5 მილიონი ევროს ოდენობით.

„პირველ რიგში ეს არის ინფრასტრუქტურა, რომელიც უეფას სტანდარტს უნდა შეესაბამებოდეს, რეკონსტრუქცია დაწყებულია და დასრულდება აპრილის თვეში,  აქ ლაპარაკია ყველა იმ დამხმარე ინფრასტრუქტურაზე, რაც სჭირდება მოედანს, მოედნის რეკონსტრუქცია მოხდება აგვისტოში როცა არ იქნება ვარჯიშები და განახლება მოხდება საფარის. დაზღვევა არის 5 მილიონი ევროსი და კიდევ უამრავი პირობა, რომელიც კონტრაქტია გაწერილი“

რა ოდენობის ინვესტიცია უნდა ჩაიდოს წალენჯიხაში ამ მიმართულებით -  როგორც მამუკა ხაზარაძე ამბობს ინვესტიციები ეტაპობრივად განხორციელდება.

„ამ ეტაპზე მარტო რეკონსტრუქციაში, საშხაპეებსა და ა.შ სადღაც ნახევარ მილიონ ლარამდე ინვესტიცია იდება და შემდეგ გაგრძელდება იმისდა მიხედვით თუ რა დასჭირდება სტადიონს და სხვა რაღაცებს. აქ იგულისხმება ბავშვების ფორმებიც, რომელიც დამატებითი ინვესტიციაა, იგულისხმება დამატებით ინვესტიციაში იტალიელი მწვრთნელები, ქართველი მწვრთნელები, მათი მოგზაურობა. 2 ქართველი მწვრთნელი უეფას სერტიფიცირებული უკვე იყო წასული „იუვენტუსში“, გაიარეს სპეციალური მომზადება, ახლა ისინი გადასახლდნენ თბილისიდან წალენჯიხაში, ვუქირავეთ სახლები, ისევე როგორც იტალიელი მწვრთნელი ცხოვრობს წალენჯიხაში.“

აღსანიშნავია ის ფაქტი, რომ ტურინის „იუვენტუსის“ საფეხბურთო აკადემიამ ბინა უნდა დაიდოს წალენჯიხაში, რომელი  ნეაპოლის საფეხბურთო კლუბის ვარსკვლავის მშობლიური ქალაქია. „კომერსანტი“ დაინტერესდა რა რეაქცია ჰქონდათ ამაზე ტურინელებს.

„რა თქმა უნდა იციან, იმიტომ რომ „იუვენტუსიც“ ფიქრობდა ხვიჩას შეძენას, ახლა მგონია რომ ძალიან გული სწყდებათ. ხვიჩა დღესაა ნაპოლიში, მე ვფიქრობ რომ უახლოეს ხანში სხვა კლუბებშიც ვიხილავთ.  ჩვენ აქ ვლაპარაკობთ ძალიან გრძელვადიან სისტემურ მიდგომაზე. მინდა გითხრათ, რომ სანამ ხვიჩა გამოჩნდებოდა „ნაპოლიში“, „ნაპოლისთანაც“ გვქონდა ჩვენ მოლაპარაკება, ისევე როგორც „ბარსელონასთან“ და რაღაც კონტაქტები გვქონდა „აიაქსთანაც“, მაგრამ ყველაზე კარგად აწყობილია „იუვენტუსი“. 90 წერტილში აქვს „იუვენტუსს“ ბავშვთა აკადემიები, ჩვენთვისაც ყველაზე კარგად მომზადებული ამ საკითხისთვის აღმოჩნდა „იუვენტუსი“. ამიტომ არაფერი დაუდგება იმას წინ, რომ  სისტემურად ავაწყოთ და გავზარდოთ ახალი ხვიჩა კვარაცხელიები.“- აღნიშნა მამუკა ხაზარაძემ.