„ბევრი მწერს, რომ ვითიბიდან ბაზისბანკში გადაყვანილებს ვერ გამოაქვთ ფული და რაიმე ხომ არ ემუქრება მათ ანაბრებს?“, — ამ კითხვას სოციალურ ქსელში საქართველოს პარლამენტის წევრი რომან გოცირიძე სვამს.

„არაფერი ემუქრება, ბაზისბანკი არის ჯანსაღი ჩინური ბანკი. ნუ გამოიტანთ ანაბრებს მას შემდეგაც, როცა ეს შესაძლებელი იქნება (ორიოდე დღეში ალბათ, რაც მორჩება ტექნიკური საკითხები). რაც შეეხება ვი თი ბი ბანკს — ამ ბანკში დარჩა მხოლოდ იურიდიული პირების ანგარიშები, ძირითადად რუსული კომპანიების. ამ ფორმით და იმ პერსპექტივით, რომ სანქციები მრავალწლიანია, ეს ბანკი დაიხურება. საჭიროა ამ პროცესის უმტკივნეულოდ წარმართვა. ეროვნული ბანკი უნდა ესაუბროს ხალხს და თავისი სიჩუმით ნუ უწყობს ხელს უსაფუძვლო აჟიოტაჟს“, — აღნიშნავს გოცირიძე.

როგორც „კომერსანტისთვის“ გახდა ცნობილი, ბაზისბანკის მსესხებლების და მეანაბრეების გაურკვევლობის მიზეზი, ბანკის მიერ მათთვის გაგზავნილი შეტყობინებები გახდა, სადაც აღნიშნულია, რომ სესხები და ანაბრები გაუნულდათ. შეტყობინებაში არ იყო მითითებული, რომ საცალო პორტფელი „ბაზისბანკს“ გადაეცა, შესაბამისად მომხმარებლებმა ჩათვალეს, რომ ანაბრები დაკარგეს, ხოლო სესხის გადახდის ვალდებულება აღარ ექნებათ.

როგორც „ვითიბი ბანკში“ და „ბაზისბანკში“ განმარტავენ, ეს სტანდარტული პროცედურული შეტყობინება იყო, მომხმარებლის ანაბრებს კი არაფერი ემუქრება და მათ მომსახურებას „ბაზისბანკი“ გააგრძელებს, სესხების დაფარვაც არსებულ პირობებში მოუწევთ.

„ბაზისბანკი თავისი 28 წლიანი ისტორიითა და 2 მილიარდამდე ლარის აქტივებით, უმსხვილესი ქართული ბანკების ხუთეულშია, ემსახურება, როგორც საცალო მომხმარებელს, ასევე მცირე, საშუალო და მსხვილ ბიზნესებს. ამასთანავე, ქართულ საფინანსო ბაზარზე, გახლავთ ბოლო ათწლეულის ყველაზე სწრაფად მზარდი ბანკი, რომელმაც დეპოზიტების პორტფელი გაზარდა 10 - ჯერ, აქტივები 15 - ჯერ, ხოლო საკრედიტო პორტფელი - 19 ჯერ. გამომდინარე იქიდან, რომ ბაზისბანკის სტრატეგიულ მიმართულებას საცალო ბიზნესის ზრდა და მომსახურების ქსელის გაფართოება წარმოადგენს, მივიღეთ გადაწყვეტილება, გადმოვიბაროთ ვითიბი ბანკის საცალო ბიზნესი, რომელიც მოიცავს, საცალო ფილიალებს, დეპოზიტებს, მიმდინარე და საბარათე ანგარიშებსა და საცალო საკრედიტო პორტფელის მომსახურებას“, - აცხადებს ბაზისბანკის გენერალური დირექტორი დავით ცაავა.

უკრაინაში რუსეთის მიერ განხორციელებული აგრესიული საომარი მოქმედებების გამო, აშშ-მა, დიდმა ბრიტანეთმა, ევროკავშირმა და სხვა ქვეყნებმა რუსულ საბანკო სისტემას ფინანსური სანქციები დაუწესა. სანქციებით გათვალისწინებული მოთხოვნების შესრულების ვალდებულების შესახებ მითითება ეროვნულმა ბანკმა საქართველოს საფინანსო სექტორის წარმომადგენლებსაც, მათ შორის „ვითიბი ბანკ ჯორჯიასაც“ მისცა, რის შედეგადაც „ვითიბიმ“ საცალო და იურიდიული პორტფელი გაასხვისა.

ნინო თამაზაშვილი