11 აპრილს, რუსულ ტელეგრამარხებში გავრცელდა ორი ვიდეო, ერთ მათგანში ასახულია როგორ სჯიან რუსი ოკუპანტები, ე.წ ვაგნერელები უკრაინელ ჯარისკაცს სიკვდილით. ისინი დაჭრილ ჯარისკაცს, რომელიც ჯერ კიდევ ცოცხალია, თავს კვეთენ. მეორე ვიდეოში კი ასახულია სხეულები მოჭრილი კიდურებით.
უკრაინის უსაფრთხოების სამსახური პირობას დებს რომ „ისინი იპოვიან რუს არაადამიანებს“.
ჩვენ ვიპოვით ამ არაადამიანებს. თუ საჭირო იქნება, მივწვდებით ყველგან, სადაც არ უნდა იყვნენ, მიწისქვეშეთიდან თუ იმქვეყნიდან. ისინი აუცილებლად დაისჯებიან იმისთვის, რაც გააკეთეს, - აცხადებს უკრაინის უსაფრთხოების სამსახურის ხელმძღვანელი ვასილი მალიუკი.
რუსეთის გაეროდან გაძევებას მოითხოვს უკრაინის საგარეო საქმეთა მინისტრი.
აბსურდია, რომ რუსეთი, რომელიც ISIS-ზე უარესია, ხელმძღვანელობს გაეროს უშიშროების საბჭოს. რუსი ტერორისტები უნდა განდევნონ უკრაინიდან და გაეროდან..., - აცხადებს დმიტრი კულება.
გავრცელებულ ვიდეოს გამოეხმაურა უკრაინის პრეზიდენტიც.
არსებობს რაღაც, რის დაიგნორებასაც ვერავინ შეძლებს: თუ როგორ ადვილად კლავენ ეს მხეცები.
ჩვენ მკვლელებისთვის არაფრის დავიწყებას და პატიებას არ ვაპირებთ. კანონიერი პასუხისმგებლობა იქნება ყველაფერზე. ტერორის დამარცხება აუცილებელია,“- განაცხადა ვოლოდიმირ ზელენსკიმ.