„ნამდვილი სადაზღვევო კომპანიების მოგება იმდენად მცირეა, ანუ ფაქტობრივად „არასაბანკო“ სადაზღვევო კომპანიები ისეთ სავალალო მდგომარეობაში არიან, რომ ესტონური მოდელის გადავადება დიდ გავლენას ალბათ არ მოახდენს, რადგან ზარალიანი კომპანიები ხომ მოგების გადასახადს ისედაც არ იხდიან“, — ამის შესახებ „კომერსანტთან“ საქართველოს სადაზღვევო ჯგუფის ხელმძღვანელმა და დაზღვევის კავშირის თანათავჯდომარე არჩილ მორჩილაძემ სექტორისთვის „ესტონური მოდელის“ ამოქმედების გადავადებასთან დაკავშირებით საუბრისას განაცხადა.
მისი თქმით, მოგების გადასახადის ესტონური მოდელით გადახდა სადაზღვევო სექტორისთვის შეღავათი იქნება და იმედოვნებს, რომ მისი ამოქმედება აღარ გადავადდება.
„ზოგადად, ეს მოდელი კარგია სექტორისთვის და უნდა გავრცელდეს. სასურველი იყო უფრო მალე მომხდარიყო მისი ამოქმედება, რათა იმ 2-3 კომპანიას, რომლებიც მცირე მოგებაზე გავიდნენ, ცოტა შეშველებოდა, მაგრამ მაინც ის ფაქტი, რომ 2024 წელს მოგება ესტონურ მოდელს დაექვემდებარება, ძალიან დადებითი ნაბიჯია.
ესტონური მოდელის ამოქმედების მოთხოვნა არერთხელ დავაყენეთ სექტორმა. ფინანსური ორგანიზაციებზე არ გავრცელდება და სადაზღვევოს რომ შეეხება, ესეც დადებითი ამბავია. იმედს ვიტოვებთ, რომ მეტი აღარ გადავადდება“, — აღნიშნა არჩილ მორჩილაძემ.
სადაზღვევო სფეროზე მოგების გადასახადის „ესტონური მოდელი“ ერთი წლის დაგვიანებით, 2024 წლიდან ამოქმედდება. როგორც ფინანსთა მინისტრმა ლაშა ხუციშვილმა „საგადასახადო კოდექსში“ შესატან ცვლილებებზე საუბრისას აღნიშნა, „სადაზღვევო სექტორი გამოიყოფა ზოგადად საფინანსო სექტორისგან და სადაზღვევო სექტორისთვის „ესტონურ მოდელზე“ გადასვლა 1 წლით გადავადდება“.