„არასწორი ინტერპრეტაციაა ხოლმე, რომ კურსის გაუფასურებას ყოველთვის მოსდევს ინფლაცია, რაც ასე არ არის. მაგალითად 2015 წელს მოხდა ლარის კურსის საკმაოდ დიდი გაუფასურება დოლარის მიმართ, მაგრამ მიუხედავად იმისა, რომ ვალუტა დაახლოებით 50%-ით გაუფასურდა, ინფლაცია მაშინდელ თარგეთზე დაბალი იყო, ამიტომ ჩვენ ყურადღება უნდა მივაქციოთ ნომინალურ ეფექტურ კურსს. თუმცა იყო პერიოდი როდესაც გაუფასურებამ იმოქმედა ინფლაციაზე“, — ამის შესახებ ეროვნული ბანკის პრეზიდენტმა კობა გვენეტაძემ, გადაცემაში „ბიზნეს ინსაიდერი“ გიორგი აბაშიშვილთან ერთად განაცხადა.

კობა გვენეტაძე აღნიშნავს, რომ მცურავი გაცვლითი კურსი არაპოპულარულია, თუმცა ის შოკების საუკეთესო მშთანთქავია.

„ჩვენ გვაქვს მცურავი გაცვლითი კურსი და მას ახასიათებს მოკლევადიანი მერყეობა, ამიტომ მოკლე პერიოდში შესაძლებელია, რომ გარკვეულწილად ლიკვიდობის ნაკლებობა იყოს ბაზარზე, ერთჯერადი გარიგება იყოს რომელიც ბაზრის მოცულობასთან შედარებით მსხვილია და ამან იმოქმედოს, მაგრამ თუ ავიღებთ საშუალოვადიან და გრძელვადიან პერიოდს იქ ფუნდამენტალური ფაქტორები მოქმედებენ, როგორიცაა ექსპორტ-იმპორტი, გადმორიცხვები, ეკონომიკური ზრდა და ა.შ. საბოლოოდ კურსი იქ წავა, სადაც ეს ფუნდამენტალური ფაქტორები წაიყვანენ და შეწინააღმდეგება ინტერვენციებით შეუძლებელი არის. ჩვენ ვცდილობთ როგორც შესაძლებელია მერყეობა შევამციროთ, მაგრამ არის სიტუაცია როცა ეს შესაძლებელია და არის სიტუაცია როცა არ არის შესაძლებელი. 

თუ მაგალითად ინტერვენციით ნებისმიერი გამყარების ნებისმიერ დროს შეჩერება შეიძლება, მაშინ ეს ნიშნავს, რომ მცურავი გაცვლითი კურსი არ გვაქვს და ეს უკვე ფიქსირებული კურსია. მიუხედავად იმისა, რომ ეს არაპოპულარულია და მტკივნეულია, უკეთესი გამოსავალი არ არსებობს. მცურავი გაცვლითი კურსი შოკების საუკეთესო მშთანთქავია. მესმის, რომ მოკლევადიან პერიოდში ეს მტკივნეულია, მაგრამ გრძელვადიან პერიოდში კარგია. ჩვენ უნდა ავირჩიოთ ან მოკლევადიან პერიოდში კურსის სტაბილურობა და გრძელვადიან პერიოდში მისი დიდი მერყეობა და დიდი გაუფასურება, ან მოკლევადიან პერიოდში მისი მერყეობა მაგრამ სამაგიეროდ საშუალოვადიან და გრძელვადიან პერიოდში მისი სიმყარე. 

ხშირად აღნიშნავენ, რომ „თუ ეროვნული ბანკი ინტერვენციებს აკეთებს კურსი მცურავი როგორ არის?“, მაგრამ ეს არ ნიშნავს იმას, რომ კურსი მართულია, მთავარია რა სახით და რა მიმართულებით ხდება ეს ინტერვენცია, ის არ უნდა არღვევდეს იმ მიმართულებას რასაც ფუნდამენტური ფაქტორები მიასწავებენ. თუ შევხედავთ საერთაშორისო სავალუტო ფონდს, როგორ აქვს ოფიციალურად დაკლასიფიცირებული გაცვლითი კურსი, მას ოფიციალურად აქვს კატეგორია მცურავი გაცვლითი კურსი“, — აღნიშნა კობა გვენეტაძემ.