ევროპულ-ქართული ინსტიტუტის ხელმძღვანელმა გიორგი მელაშვილმა რადიო “კომერსანტის“ ეთერში გიორგი აბაშიშვილის საავტორო გადაცემაში “ბიზნესინსაიდერი“ ევროკავშირის კითხვარის ეკონომიკურ ნაწილზე ისაუბრა და აღნიშნა, რომ ეკონომიკა არ არსებობს დამოუკიდებლად და სრულიად კავშირშია სოციალურ სფეროსთან, სასამართლოსთან და ზოგადად ქვეყნის განვითარებასთან.
მისივე თქმით კითხვარიდან გამომდინარე იყო მთელი რიგი საკითხები და არსებობს ორი კრიტერიუმი ერთი არის კოპენჰაგენის მეორე მაასტრიხის, რომელიც სიღრმისეული ეკონომიკური კრიტერიუმებია, მელაშვილმა ასევე აღნიშნა, საქართველოს სუფთა ეკონომიკური თვალსაზრისით ძალიან ცუდი მდგომარეობა არ აქვს.
“მდიდარი ქვეყანა არ ვართ, მაგრამ კორონავირუსამდე ჩვენ ასე თუ ისე ნორმალური ქვეყნის იმიჯი გვქონდა, ახლა სიტუაცია ცოტა გაუარესებულია, თუმცა მაკროეკონომიკური პარამეტრებით სიტუაცია გაუარესებულია ყველგან, ამიტომ აქ დიდად გასაკვირი არაფერი არ არის, ამაში პანდემიამ ძალიან დიდი როლი ითამაშა.
უშუალოდ ეკონომიკური რეფორმებიდან, მე ხაზს გავუსვამდი სასამართლო რეფორმას, არავინ არ ჩადებს ფულს ქვეყანაში, რომლის სასამართლო სისტემა არ არის გამართული და პოლიტიკური წნეხისგან თავისუფალი. ჩვენ წლების განმავლობაში ყველა ანგარიშში , რომელიც ჩვენ ევროკავშირისგან გვინახავს , ყველა დოკუმენტში, მათ შორის შარლ მიშელის შეთანხმებაში, ყველგან ხაზი ესმებოდა იმას, რომ აუცილებლად უნდა მოხდეს სასამართლოს რეფორმა“. - აღნიშნა გიორგი მელაშვილმა.
კითხვაზე , რაიმე ტიპის კონკრეტული შემზღუდავი ვალდებულება, კონკრეტულ ციფრობრივ ნაწილში რომ Gdp იყოს X ან ვალი გვქონდეს Y მოთხოვნა ხომ არ გვაქვს გიორგი მელაშვილი პასუხობს, რომ ამ ეტაპზე საქართველო კოპენჰაგენის კრიტერიუმს ციფრობრივად ვერ აკმაყოფილებს, თუმცა არსებობს გამონაკლისები, არსებობს ქეისები ევროკავშირის შიგნით, როდესაც ქვეყანა კრიტერიუმს დიდად არ აკმაყოფილებდა, თუმცა ევროკავშირის წვერი მაინც გახდა.
„ამ შემთხვევაში ჩვენ ხაზი უნდა გავუსვათ ასევე პოლიტიკურ მდგენელს, იმ შემთხვევაში თუ საქართველო დააკმაყოფილებს პოლიტიკურ მოთხოვნებს და საკმარის მედეგობას აჩვენებს, შეიძლება ამ შემთხვევაში ეკონომიკური პარამეტრები იყოს ის კომპრომისული ვარიანტი, რომელზეც ევროკავშირი დახუჭავს თვალს და მათ აქაჩვაში თვითონ მოგვეხმარება. მსგავსი შემთხვევა მომხდარა ბალტიის ქვეყნების შემთხვევაში.
დღევანდელი უკრაინაში მიმდინარე მოვლენების ფონზე ვხედავ, რომ არსებობს პოლიტიკური მზაობა, რომ ევროკავშირის შიდა პოლიტიკურმა აქტორებმა მხარი დაუჭირონ ჩვენ წევრობას თუ ისინი იქნებიან დარწმუნებული იმაში, რომ პოლიტიკურად და ინსტიტუციურად საქართველო იქნება ამისთვის მზად“ - აღნიშნა გიორგი მელაშვილმა.
თაკო კვაჭანტირაძე