როდის გაიხსნება ოფიციალურად ზამთრის ტურისტული სეზონი, ჯერ კიდევ არ არის ცნობილი. მიუხედავად ამისა, „ინნ გრუპის“ ხელმძღვანელი, ერეკლე კოკაია ,,ბიზნესპრესნიუსთან“ ამბობს, რომ ჯავშნები როგორც ქვეყნის შიგნიდან, ასევე საზღვარგარეთიდანაც საკმაოდ დიდი რაოდენობით არის.

მისი თქმით, გუდაურისა და ბაკურიანის სასტუმროშიც, საახალწლოდ უკვე ყველა ნომერი დაჯავშნილია.

,,ზამთრის სეზონი მართალია, ჯერ ოფიციალურად არ გახსნილა, თუმცა საბედნიეროდ, ჯავშნები უკვე არის. არც ბაკურიანში და არც გუდაურში ახალი წლისთვის ნომერი აღარაა თავისუფალი.

ტრადიციულად, ბაკურიანში დამსვენებლების დიდი უმრავლესობა ქართველია, ხოლო გუდაურში უცხოელები. გუდაურში ძირითადად ამ ეტაპზე ჯავშნები ისრაელიდან, ბალტიისპირეთიდან და არაბული ქვეყნებიდან გვაქვს. ნელნელა ემატება დსთ-ს ქვეყნებიც“,- განაცხადა კოკაიამ.

მისივე თქმით, სასტუმრო სექტორისთვის კოვიდ პასპორტის რეგულაციის აღსრულება ბევრად მარტივია, ვიდრე სარესტორნო ბიზნესისთვის.

,,სასტუმროებისთვის გაცილებით მარტივია კოვიდ პასპორტის რეგულაციების შესრულება, განსხვავებით რესტორნებისგან. ჩვენი სტუმრების დიდი ნაწილი უცხოელია, რომლებიც ისედაც აცრილები არიან. მათ შემთხვევაში პრობლემა იყო ის, რომ ქართული აპლიკაცია არ აღიქვამდა მათ მონაცემებს, თუმცა უკვე ეს პრობლემაც გადაჭრილია.

რაც შეეხება ქართველ სტუმრებს, მაღალი კლასის სასტუმროებში, მათი დიდი უმრავლესობაც აცრილია. ასე რომ კოვიდ პასპორტის ამოქმედებით, სასტუმრო სექტორს მომხმარებელი თითქმის არ შემცირებია“ - განუცხადა კოკაიამ ,,ბიზნესპრესნუსს“.

bpn.ge