ძალიან მკაცრი რეაგირება იქნება თითოეულ მსგავს ფაქტზე,- ამის შესახებ საქართველოს პრემიერ-მინისტრმა ირაკლი ღარიბაშვილმა ჟურნალისტის კითხვის საპასუხოდ განაცხადა, რომელიც მისივე თქმით, აუდიტისის დასკვნას ეხებოდა ქუთაისის მერიაზე.
ირაკლი ღარიბაშვილის თქმით, არც ერთი პრობლემა არ დარჩება რეაგირების გარეშე.
"თუ თქვენს მიერ ნახსენები ინფორმაცია სიმართლეა, ჯერ არ მინახავს,მაგრამ აუცილებლად მოვიკითხავ, არც ერთი ასეთი ბრალდება, პრობლემა და კითხვა არ დარჩება რეაგირების გარეშე. ძალიან მკაცრი რეაგირება იქნება თითოეულ მსგავს ფაქტზე. ამას გპირდებით მე," - აღნიშნა პრემიერმა.
შეგახსენებთ, სახელმწიფო აუდიტის მიერ ჩატარებული ქუთაისის მუნიციპალიტეტის 2019-2020 წლების საქმიანობის შესაბამისობის აუდიტის შედეგად მუნიციპალიტეტის საქმიანობაში სხვადასხვა სახის დარღვევები გამოვლინდა. მუნიციპალიტეტში არსებობს ფინანსური რესურსების მართვის ხარვეზები. ირკვევა, რომ „2019-2020 წლებში ქუთაისის მუნიციპალიტეტში დასაქმებულ მოსამსახურეებზე, სათანადო დასაბუთების გარეშე, სოციალური დახმარების სახით, ჯამში გაიცა 358.2 ათასი ლარი. დახმარება გაცემულია მერიისა და საკრებულოს მაღალანაზღაურებად თანამდებობის პირებზეც, რომლებსაც, თანამდებობის პირთა დეკლარაციის მიხედვით, სოლიდური შემოსავლები გააჩნიათ.