ე.წ აგენტების შესახებ კანონმა საზოგადოების პროდასავლური და პრორუსული ნაწილის კონტურები საბოლოოდ გამოკვეთა. ნებით თუ უნებლიედ კონფორმისტების და პრორუსულ ნაწილში მოექცნენ ისინიც, ვინც პოზიციის დაფიქსირებას სტრატეგიული დუმილი არჩია.

მთელი ამ ხნის განმავლობაში „კომერსანტი“, როგორც ბიზნეს-მედია აქტიურად ინტერესდებოდა ბიზნესმენების პოზიციით მიმდინარე მოვლენებთან დაკავშირებით. მათი დიდი ნაწილი, განსაკუთრებით მსხვილი ბიზნესები, პოზიციის დაფიქსირებისგან თავს იკავებდნენ და იკავებენ.

თუმცა არსებობენ ბიზნესსექტორის ის წარმომადგენლები, რომლებიც პოზიციასაც ღიად აფიქსირებენ და ქმედით ნაბიჯებსაც დგამენ, როგორც ქვეყნის პროდასავლური კურსის დასაცავად, ასევე კონფორმიზმის წინააღმდეგაც. ასეთი შემთხვევა არაერთი დაფიქსირდა საქართველოში, მასშტაბური პროტესტის დღეებში.

საქართველოს ევროპული გზის დასაცავად გამოდის „გალაკტიონიც“ - პროტესტის ეპიცენტრს 1300 კილომეტრით დაშორებული ქართული რესტორანი სტამბოლში, რომელიც ამავდროულად ქართულის კულტურის ცენტრიცაა.

როგორც რესტორნის მფლობელი ქართველი მწერალი და მასწავლებელი, ირაკლი კაკაბაძე ამბობს, ისინი არ თანამშრომლობენ და არ მასპინძლობენ მათთან, ვინც ქვეყნის მომავალს მტრობს.

„მე ამათ დიდი ხანია არ ვესალმები, მეტიც, არც კარს ვუღებ და დაპურებაზეც უარს ვეუბნები. სია ვრცელია, ნელა-ნელა ყველას გაგაცნობთ. აიღეთ მაგალითი, ვინც ქვეყანას ღალატობს, ყველამ უნდა იგრძნოს უხერხულობა“- წერს ირაკლი კაკაბაძე ფეისბუკზე და კონკრეტულ პირებთან მიმოწერებს აქვეყნებს, სადაც ის მათ თანამშრომლობაზე უარს ეუბნება.