1921 წელს ემიგრაციაში წასული ქართველი თავადი არჩილ გურიელი ჯერ ავსტრიაში, შემდეგ საფრანგეთში, 1937 წლიდან კი ამერიკის შეერთებულ შტატებში ცხოვრობდა, სადაც მსოფლიოს ერთ-ერთ უმდიდრეს ქალზე, პარფიუმერიის დედოფლად წოდებულ ჰელენ რუბინშტეინზე იქორწინა.

ჰელენა პოლონელი ებრაელი გახლდათ და უზარმაზარ პარფიუმერულ კომპანია „ჰელენა რუბინშტეინს“ ფლობდა, რომელიც ამჟამად L'Oreal-ის ჯგუფში შედის. ჰელენა რუბინშტეინი აქტიურ საზოგადოებრივ ცხოვრებას ეწეოდა. ის აფინანსებდა მოგზაურ ხელოვანებსა და ებრაელ სტუდენტებს, ასევე მრავალ გამოკვლევას სამეცნიერო სფეროში და მნიშვნელოვან როლს ასრულებდა ამერიკა-ისრაელის კულტურულ ფონდში.

ცოლ-ქმარმა წარმატებული ერთობლივი ბიზნესი შექმნა და საფუძველი ჩაუყარა Gurieli Apothecar-ის ხაზს. უშვებდნენ ძვირადღირებულ კოსმეტიკას ქალბატონებისა და მამაკაცებისათვის. პარიზის სალონს გურიელის და - მარიამ ჭყონია ხელმძღვანელობდა, რომელიც კოკო შანელის ქუდების მოდელიერი იყო.

არჩილ გურიელი ცნობილ ადამიანებთან მეგობრობდა. მათ შორის: ჯანეტ მაკდონალდთან, ეროლ ფლინთან, გრეგორი პეკთან, ერნესტ ჰემინგუეისთან, ჯეიმს ჯოისთან და სალვადორ დალისთან. ესპანელმა მხატვარმა ცოლ-ქმრის პორტრეტებიც შექმნა: „ჰელენა რუბინშტეინი – კლდეზე მიჯაჭვული ქალი – პრომეთე“ და „არჩილ გურიელი-ჭყონია ჩაქურაში“. გურულ ჩაქურაში გამოწყობილი არჩილ გურიელის პორტრეტი მთებისა და მიჯაჭვული ამირანის ფონზეა დახატული, ზუსტად ისე, როგორც გურიელმა აღუწერა სალვადორ დალის საქართველო.

არჩილ გურიელი-ჭყონია 1955 წელს მანჰეტენზე, გულის შეტევით, გარდაიცვალა. ჰელენამ მეუღლის გარდაცვალების შემდეგ 10 წელი იცოცხლა. არჩილ გურიელ-ჭყონიას შთამომავლობა არ დარჩენია, მთელი მისი ქონება, საქორწინო კონტრაქტის მიხედვით, ჰელენას მფლობელობაში გადავიდა.

სალვადორ დალის მიერ დახატული არჩილ გურიელის პორტრეტი 1943 წელსაა შექმნილი და მისი ფასი $1 მილიონიდან $1.5 მილიონამდე მერყეობს.

მოამზადა მაკა ბიბილაშვილმა