რვა დღეა რაც საყოველთაო ჯანდაცვის პროგრამაში ჩართულ კლინიკებთან ანგარიშსწორება დიაგნოზთან შეჭიდული ჯგუფებით (DRG) დაფინანსების მოდელით მოხდება. სადაზღვევო ბიზნესი ამბობს, რომ DRG-ის ფარგლებში ტარიფები სამართლიანი არაა და უკვე არის შემთხვევები, როდესაც სამედიცინო დაწესებულებები უარს ამბობენ DRG-ში ჩართვაზე.

სადაზღვევო კომპანია „არდის“ საოპერაციო დირექტორი ეკა ერგემლიძე რადიო „კომერსანტის“ გადაცემა „კომერსანტის დილაში“ სტუმრობისას აცხადებს, რომ საქართველოში DRG სისტემა ინერგება დამფინანსებლების, ანუ სადაზღვევო კომპანიების, ჩართულობის გარეშე.

„ზოგადად დაფინანსების ეს მეთოდი, DRG სისტემა დანერგილია მრავალ განვითარებულ ქვეყანაში და ის არის სარგებლის მომტანი. ვინაიდან დანერგილია სწორად და რეფორმები ამ ქვეყნებში თავის დროზე სწორად გატარდა.

სამწუხაროდ ჩვენთან DRG სისტემა ინერგება დამფინანსებლების ჩართულობის გარეშე. ამ შემთხვევაში ვგულისხმობ სადაზღვევო ინდუსტრიას. ჩვენ არანაირი კონსულტაციები არ გაგვივლია ჯანდაცვის სამინისტროსთან, მანამდე ვიდრე მოსამზადებელი პერიოდი იყო, მიუხედავად იმისა, რომ ვართ ქვეყანაში მეორე მსხვილი დამფინანსებელი სახელმწიფოს შემდეგ. ამიტომ ფასები, განფასება, ტარიფები დიაგნოზთან შეჭიდული ჯგუფების, რაც ამოქმედდა და მუშაობს უკვე გვაფიქრებინებს, რომ არ არის ადეკვატური და სამართლიანი. ვინაიდან გვაქვს შემთხვევები, როდესაც სამედიცინო დაწესებულებები უარს ამბობენ ამ სისტემაში ჩართვაზე და ისინი პრაქტიკულად არ ითანამშრომლებენ დაფინანსების ამ მეთოდით ჯანდაცვის სამინისტროსთან. რაც თავისთავად გავლენას იქონიებს როგორც ჯიბიდან გადამხდელებზე, ასევე სადაზღვევო ინდუსტრიაზე“, - ამბობს სადაზღვევო კომპანია „არდის“ საოპერაციო დირექტორი.

ეკა ერგემლიძე მიიჩნევს, რომ ბიზნესს აქვს სრული საფუძველი იმის ვარაუდისთვის, რომ ეს განფასება არ არის ადექვატური, გამომდინარე იქიდან რომ არც თუ ისე ცოტა სამედიცინო დაწესებულება უკვე უარს ამბობს ამ განფასებით ჯანდაცვის სამინისტროსთან თანამშრომლობაზე.

„ეს ჩვენთვის ერთ-ერთი ინდიკატორია. მეორე ინდიკატორი არის ის, რომ არიან პაციენტები, რომლებიც უარს ამბობენ სახელმწიფო დაფინანსებაზე და სურვილი ჩნდება, რომ გადაიხადონ ჯიბიდან ან დაუფინანსოს სადაზღვევო კომპანიამ გარკვეული სერვისები, რაც ასევე იმას ნიშნავს, რომ კლინიკებსაც აქვთ მოტივაცია, რომ პაციენტმა უარი თქვას ამ განთავსების სამედიცინო მომსახურების გაწევაზე.

DRG სისტემას უნდა ჰქონდეს პირიქით ეფექტი, რომ ჯიბიდან დანახარჯები შემცირდეს, შეუწყოს ხელი სამედიცინო ხარისხის ზრდას, მაგრამ ასეთი სეგმენტირებული დაფარვა ანუ ის რომ მხოლოდ საყოველთაო პროგრამის მოსარგებლეებისთვის ხდება DRG-ს დაფინანსება, პირიქით ნეგატიური ეფექტების მოლოდინს გვიქმნის“, - ამბობს „არდის“ საოპერაციო დირექტორი.

სადაზღვევო კომპანიის მენეჯერი ფიქრობს, რომ ჯერ კიდევ DRG-ის შემუშავების პროცესში უნდა ყოფილიყო მჭიდრო თანამშრომლობა სახელმწიფო და კერძო სექტორს შორის და მომხდარიყო თითოეული ნიუანსის გათვლა და გაანგარიშება.

„სამედიცინო დაწესებულებებიდანაც გვესმის, რომ არ იყვნენ სათანადოდ ჩართული პროცესში. იყო გარკვეული კონსულტაციები, მაგრამ უფრო ზოგადი ხასიათის. სადაზღვევო ინდუსტრია ამ პროცესში პრაქტიკულად ჩართული არ ყოფილა“, - ამბობს ეკა ერგემლიძე.

ამ ფონზე კი ბიზნესს ნეგატიური მოლოდინი აქვს და „არდიში“ ფიქრობენ, რომ სამომავლოდ ტარიფების გაძვირება გარდაუვალი იქნება.

„ადამიანებისთვის და სადაზღვევო კომპანიებისთვის ფასების ზრდის მოლოდინი გვაქვს. შესაბამისად თუ სადაზღვევო კომპანიისთვის დანახარჯები იზრდება ეს პირდაპირ აისახება დაზღვევის პრემიის ნაწილზე, რაც ნიშნავს რომ დაზღვევა გაძვირდება“, - განმარტავს სადაზღვევო კომპანია „არდის“ საოპერაციო დირექტორი.

აღსანიშნავია, რომ 1-ლი ნოემბრიდან სამედიცინო მომსახურების დაფინანსების რეფორმა ძალაში შევიდა და შესაბამისად დღეისათვის საყოველთაო ჯანდაცვის პროგრამაში ჩართულ კლინიკებთან ანგარიშსწორება დიაგნოზთან შეჭიდული ჯგუფებით (DRG) დაფინანსების მოდელით ხდება. DRG სისტემით, ავტომატურად გამოითვლება ის სამართლიანი ფასი, რასაც სახელმწიფო, მოქალაქეების ხარისხიანი მკურნალობისთვის გადაიხდის.

ჯანდაცვის სამინისტროს ინფორმაციით, ახალი მეთოდის მიხედვით ერთსა და იმავე მომსახურებას, ყველა კლინიკაში, ერთი ტარიფი ექნება. პაციენტი მხოლოდ იმ თანხას გადაიხდის, რასაც საყოველთაო ჯანდაცვის პროგრამის ფარგლებში, თანაგადახდის წილი (0-დან 30%-მდე, პაკეტების შესაბამისად) ითვალისწინებს. კლინიკა კი საყოველთაო ჯანდაცვის პროგრამაში ჩართულ პაციენტს, დამატებით გადასახადს ვეღარ დაუწესებს.