კომპანია „არემჯი“ სოფელ მუშევანში განვითარებული მოვლენებთან დაკავშირებით განცხადებას ავრცელებს, რომელსაც „კომერსანტი“ უცვლელად გთავაზობთ:

„მუშევანის ლიცენზიას „არემჯი“ ფლობს 2011 წლიდან. შესაბამისი სანებართვო პროცედურების გავლის შემდეგ, ვაპირებთ ამ პროექტის განხორციელებას, რომელიც ვფიქრობთ მნიშვნელოვან განვითარებას მოუტანს სოფელ მუშევანს და მთლიანად ბოლნისის მუნიციპალიტეტს.

კომპანიამ უკვე გადადგა არაერთი ქმედითი ნაბიჯი, კერძოდ ადგილობრივ მოსახლეობასთან გააფორმა სოფლის განვითარების მემორანდუმი განახორციელა არაერთი მნიშვნელოვანი პროექტი, რომლის პოზიტიურ შედეგებსაც უკვე გრძნობს მუშევანის მოსახლეობის აბსოლუტური უმრავლესობა. კერძოდ, მიმდინარეობს სოფლის წყლით მომარაგების სამუშაოები, სხვადასხვა სოციალური და ინფრასტრუქტურული პროექტები.

ვფიქრობთ, სწორედ ამ პერსპექტივის დასაცავად გამოვიდა დღეს მუშევანის მოსახლეობა და პასუხი გასცა იმ დეზინფორმაციას, რომელიც მიზნად ისახავს პროექტის გაჩერებას.

მუშევანის პროექტი მდებარეობს სოფლიდან მოშორებით, ამდენად სოფელზე გამორიცხულია რაიმე ფორმის ზემოქმედება ეკოლოგიური თვალსაზრისით, რაც დასტურდება წინასწარ ჩატარებული კვლევებით და ცნობილია მოსახლეობის უმრავლესობისთვის. ჩვენი სურვილია კომპანიის განვითარებას თან ახლდეს ახლო მდებარე სოფლებისა და მთლიანად რეგიონის კეთილდღეობა და განვითარება. კომპანია ემიჯნება ყველანაირ დაპირისპირებას და მოვუწოდებთ მხარეებს დიალოგისკენ“,  — აღნიშნულია „არემჯის“ განცხადებაში.

შეგახსენებთ, რომ ბოლნისის სოფელ მუშევანში დღეს დილიდან ხმაური იყო. მოსახლეობის ნაწილი „არემჯის მიერ სოფლის სიახლოვეს სასარგებლო წიაღისეულის ღია კარიერული წესით მოპოვების წინააღმდეგ საპროტესტო პეტიციის გავრცელებას და შესაბამისად აქციას  გეგმავდა. თუმცა დემონსტრანტებს ადგილზე თანასოფლელები დახვდნენ, რომელთაც მათ უთხრეს, რომ აქციას არ ჩაატარებინებდნენ.

აქციის მოწინააღმდეგები ამბობენ, რომ „არემჯი მათ სანაცვლოდ წყლისა და გაზის გაკეთებასა და სკოლის გარემონტებას დაჰპირდა და ხაზს უსვამენ, რომ არ ეწინააღმდეგებიან კომპანია „არემჯის“.

(R)