არგენტინა და ბრაზილია ფინანსური და კომერციული ტრანზაქციებისთვის ერთიანი ვალუტის შექმნის შესახებ გადაწყვეტილებას მომავალ კვირას გამოაცხადებენ, ამის შესახებ Bloomberg-ი და Financial Times-ი წერენ.

FT-ის ინფორმაციით, ახალ ვალუტას Sur ერქმევა, რაც „სამხრეთს“ ნიშნავს.

საკითხი სამხრეთ ამერიკის ორი უმსხვილესი ეკონომიკის წარმომადგენელმა ბუენოს-აირესში გამართულ სამიტზე განიხილა. ბრაზილიის შეთავაზებით ახალ ვალუტას Sur (ესპანურად „სამხრეთი) შეიძლება ერქვას. მხარეები განიხილავენ, როგორ დაეხმარება ერთიანი ვალუტა რეგიონული ვაჭრობის გაფართოებას და აშშ დოლარზე დამოკიდებულების შემცირებას. თავდაპირველად, როგორც დაგეგმილი იყო, ახალი ვალუტა ბრაზილიურ რეალთან და არგენტინულ პესოსთან ერთად იქნება მიმოქცევაში.

არგენტინის ეკონომიკის მინისტრმა სერხიო მასამ დაადასტურა, რომ ბუენოს აირესი და ბრაზილია პროექტში მონაწილეობისთვის რეგიონის სხვა ქვეყნებს ეპატიჟებიან.

„ეს არის პირველი ნაბიჯი იმ გრძელ გზაზე, რომელიც ლათინურმა ამერიკამ უნდა გაიაროს. საერთო ვალუტაზე გადასვლას დიდი დრო დასჭირდება: ევროპას 35 წელი დასჭირდა ევროს შესაქმნელად“, - განაცხადა მინისტრმა.

რეგიონში დოლარის გავლენის დასაძლევად, სამხრეთ ამერიკის ორი უმსხვილესი ეკონომიკა ათწლეულებია მათი ვალუტების კოორდინაციისთვის სხვადასხვა ვარიანტებს განიხილავს. ბოლო მოლაპარაკებები არგენტინის მიერ დაიწყო, რომელიც ბოლო სამი ათწლეულის განმავლობაში ყველაზე მაღალ ინფლაციას ებრძვის.