,,წარმოუდგენელი ტემპით იზრდება ქართული პროდუქციის ექსპორტი“ - ამის შესახებ ეკონომიკის მინისტრმა რადიო ,,პალიტრასა“ და ,,პალიტრანიუსის“ გადაცემაში ,,საქმე“ განაცხადა.

ნათია თურნავამ, 2021 წლის მაჩვენებლები მიმოიხილა. მისი თქმით, ქართული ეკონომიკა ჯანსაღდება და მნიშვნელოვანია, რომ ამას ბიზნესი საკუთარ საქმიანობაზე გრძნობს.

,,ბიზნესის მოლოდინები ძალიან მნიშვნელოვანი ფაქტორია. ჩვენ ვხედავთ, რომ ბიზნესი ენდობა მომავალს. იმ მაღალი ციფრების მიღმა რასაც ჩვენ ვახმოვანებთ, არის ირიბი მაგრამ ძლიერი ინდიკატორები, რომ ხდება ეკონიმიკის სერიოზული გაჯანსაღება. ეს ინდიკატორია, რომ ადგილობრივი ბიზნესი სულ უფრო მეტ ინვესტიციას ახორციელებს. ეს გამოიხატება პრივატიზაციის მაჩვენებელშიც. წლის დასაწყისიდან 260 მლნ ლარის ქონებაა გაყიდული. ეს ორჯერ მეტია გასული წლის მაჩვენებელზე.

ასევე მზარდია იპოთეკური და ბიზნეს სესხების მოცულობა. მოგეხსენებათ, ესეც ხდება მაშინ, როცა სტაბილურობის განცდა არსებობს, რომ მომავალი 7-10 წელი შემოსავალი ექნება ბიზნესს ან კერძო პირს. კიდევ ერთი, უმნიშვნელოვანესი ინდიკატორი ვალუტის კურსის სტაბილურობაა, რამაც დადებითი როლი შეასრულა. არ გამოვრიცხავ, ლარის გამყარების ტენდენცია მომავალ თვეებშიც გაგრძელდეს. რთულია ამ კუთხით პროგნოზირება, თუმცა ის ფაქტი, რომ ტურიზმი მნიშვნელოვნად ჯანსაღდება. მიუხედავად პანდემიისა, წარმოუდგენელი ტემპით იზრდება ქართული პროდუქციის ექსპორტი. ახლა გამოქვეყნდა პირველი რვა თვის შედეგები და 26-27%-ით გვაქვს გაზრდილი ექსპორტი წინა წელთან შედარებით და 2019 წელთან შედარებით 7%-ით. არასოდეს იმდენი ლურჯი მოცვი და ვაშლი არ გასულა ქვეყნიდან რამდენიც გასულ წელს და ეს ტენდენცია გრძელდება“ - განაცხადა თურნავამ.

მინისტრმა, 10 წლიანი გეგმის შესახებაც ისაუბრა და თქვა, რომ 3-4 წელში, იმპორტი სულ მცირე 40%-ით უნდა შემცირდეს.

,,ჩვენ, პრემიერის დავალებით გავაკეთეთ 10 წლიანი გეგმა, რათა დავინახოთ რა მიზნობრივ მაჩვენებლებზე უნდა გავიდეთ, რომ ვთქვათ ადგილობრივ წარმოებას კიდევ უფრო მეტად დავუდექით გვერდში და დავეხმარეთ. ამისთვის არსებობს სპეც პროგრამები ექსპორტის წახალისების. რომლის ფარგლებშიც შევარჩიეთ 60 ბიზნეს საქმიანობა, რომელსაც აქვს ექსპორტზე გასვლის პოტენციალი შედეგად, უახლოეს 3-4 წელში ველოდებით, რომ იმპორტი სულ მცირე 40%-ით შემცირდება, ხოლო ექსპორტი გაორმაგდება“- განაცხადა ეკონომიკის მინისტრმა ,,საქმეში“.

bpn.ge