გაძვირებული არმატურა, ბეტონი, სამშენებლო და ინერტულ მასალები, ეროვნული ვალუტის არასტაბილური და არაპროგნოზირებადი კურსი - დეველოპერული სექტორი უახლოეს მომავალში მნიშვნელოვანი გამოწვევების წინაშე შეიძლება აღმოჩნდეს. ბაზარი ახლა უძრავი ქონების გაძვირების მოლოდინშია.
1 კვ/მ–ის ფასი 120 დოლარით უკვე გაზარდა ერთ-ერთმა უმსხვილესმა დეველოპერულმა კომპანიამ. „არქის“ გენერალური დირექტორი შიო ხეცურიანი გვიყვება, რომ ზრდის ტენდენცია უახლოეს მომავალშიც შენარჩუნდება და უძრავ ქონებაზე ფასი საშუალოდ 250 დოლარით გაიზრდება. როგორც ის ამბობს, კომპანიის მთავარი მიზანი სტაბილურობის შენარჩუნება და იმ ვალდებულებების შესრულებაა, რომელიც „არქელების“ წინაშე აქვთ აღებული.
„მშენებლობა რისგანაც შედგება ფაქტობრივად ყველაფერი გაძვირდა. ფასი განსაკუთრებით არმატურაზეა გაზრდილი. საფასო პოლიტიკას ნაწილობრივ გადავხედეთ, სარეალიზაციო ფართის მშენებლობის ღირებულება 100-120 დოლარით უკვე გაძვირდა. როგორც ვხვდებით, ტენდენცია იქითკენ მიდის, რომ ფასი კიდევ 150 დოლარით შეიძლება გაიზარდოს, ანუ 1 კვ/მ უძრავი ქონების საშუალო ფასი ჯამში 250 დოლარი და მეტით შეიძლება გაიზარდოს.
როგორც ყველა დეველოპერი, იძულებულები ვიქნებით, თვითღირებულების ზრდასთან ერთად სარეალიზაციო ფასი გავზარდოთ. ჩვენთვის მთავარია კომპანიამ ფინანსური სტაბილურობა შეინარჩუნოს და ის პასუხისმგებლობა, რაც გვაქვს აღებული ჩვენს კლიენტებთან, სრულად შევასრულოთ. მშენებლობის თვითღირებულება იზრდება და ჩვენთვის გაყიდულ ბინებზე მომგებიანობა არათუ შემცირდება, არამედ შეიძლება საერთოდ არ იყოს“, - აცხადებს შიო ხეცურიანი.
„არქის“ გენერალური დირექტორი ამბობს, რომ ბაზარზე შექმნილი არასტაბილური მდგომარეობის მიუხედავად, ყველა მიმდინარე პროექტი, რომელიც კომპანიას აქვს, შეფერხების გარეშე, თავის ვადაში დასრულდება. თუმცა, შიო ხეცურიანი აქვე ამბობს, რომ „არქი“ მომავალ პროექტებს შეამცირებს .
„ვგეგმავთ, რომ მაქსიმალურად შევინარჩუნოთ მშენებლობის მიმართულებით ის ტემპი, რაც გვაქვს, ჩვენს მომხმარებელს შევთავაზოთ კიდევ უფრო გაუმჯობესებული პროდუქცია. წელს არაერთი პროექტის დაწყებას ვაპირებდით, სავარაუდოდ მომავალში ნაკლებ პროექტს დავიწყებთ, მანამ სანამ არ დავინახავთ, რომ ბაზარზე სიტუაცია დასტაბილურდა“, - ამბობს ხეცურიანი.
კომპანიის დირექტორი ამბობს იმასაც, რომ საქართველოში უძრავი ქონების ფასი გაზრდა ბინების გაყიდვებს შეამცირებს:
„ლოგიკურია, რომ გაყიდვები შეიძლება შემცირდეს - ფასის ზრდასთან ერთად მოთხოვნა ისეთი აღარ იქნება, როგორიც პირობითად დღეს არის. იმდენად, არასტაბილური სიტუაციაა ბაზარზე, პროდუქციის ღირებულებასთან დაკავშირებით სურათი ყოველდღიურად იცვლება, ამიტომ გამიჭირდება იმის თქმა, რა მაჩვენებლით შემცირდება გაყიდვები“, - თქვა „არქის“ გენერალურმა დირექტორმა.
შეგახსენებთ, რომ საქსტატის ინფორმაციით, 2021 წლის III კვარტალში მშენებლობის ღირებულების ინდექსი წინა კვარტალთან შედარებით 1.8 პროცენტით გაიზარდა. აღნიშნული ცვლილება, ძირითადად, განპირობებული იყო სამშენებლო მასალებზე ფასების 2.7 პროცენტიანი მატებით, რამაც 1.59 პროცენტული პუნქტი შეიტანა ჯამური ინდექსის ცვლილებაში.
წინა 2020 წლის შესაბამის კვარტალთან შედარებით მშენებლობის ღირებულების ინდექსი 14.1 პროცენტით გაიზარდა. ინდექსის ზრდა, ძირითადად, გამოწვეული იყო სამშენებლო მასალებზე ფასების 19.6 პროცენტიანი ზრდით. რაც 11.07 პროცენტული პუნქტით აისახა მთლიანი ინდექსის ცვლილებაზე.
ბაჩო ადამია