10 დეკემბერს, ექსპო ჯორჯიას მე-3 პავილიონში საქართველოში სამშენებლო-დეველოპერული სექტორის დასაქმების პირველი ფორუმი გაიმართა. სექტორული დასაქმების პირველი ფორუმი უძრავი ქონების საერთაშორისო ფედერაცია FIABCI-Georgia-ს, უძრავი ქონების #1 ჰაბ Property Georgia-ს და მშენებლობის მართვის კომპანია CMC-ის ორგანიზებით ჩატარდა.
რა იყო ამ ფორუმის მიზანი და რა შედეგები მიიღეს მონაწილე კომპანიებმა. ამის შესახებ „კომერსანტის“ ეთერში კომპანია CMC-ის ბიზნესისა და ორგანიზაციული განვითარების დირექტორმა ნინო მესაბლიშვილმა ისაუბრა.
ნინო მესაბლიშვილის თქმით, ფორუმის გამართვის მიზანი იყო სექტორში არსებული გამოწვევების ანალიზი და პრობლემების გადაწყვეტის გზების პოვნა.
„გამოწვევები არის საკმაოდ დიდი და საკმაოდ რთულია ამ მიმართულებით კადრების მოძიება, ამიტომ ვიფიქრეთ, რომ სექტორულ ფორუმს უფრო მეტი მნიშვნელობა ექნებოდა დასაქმების მსურველთათვის. პირველ ფორუმში მონაწილეობას იღებდა დეველოპერული-სამშენებლო და უძრავ ქონებასთან დაკავშირებული 20-მდე კომპანია. საკმაოდ საინტერესო იყო, 100-მდე სტუდენტი მოვიდა სხვადასხვა უნივერსიტეტიდან, ასევე დასაქმების სხვა მსურველებიც.
გვქონდა პანელური დისკუსიები და პატარა ტრენინგები სამუშაოს მაძიებელთათვის. საკმაოდ ინტერაქტიური და საინტერესო გამოვიდა სამუშაოს მაძიებელთათვის და კომპანიებისთვისაც,“ - აღნიშნა ნინო მესაბლიშვილმა.
რამ შექმნა კადრების დეფიციტი სამშენებლო სექტორში - სექტორის ზრდამ თუ კადრების საზღვარგარეთ გადინებამ. ნინო მესაბლიშვილი ამბობს, რომ კადრების დეფიციტზე ორივე მიზეზმა იმოქმედა.
„საკმაოდ აქტიურად მიდის სამშენებლო პროცესი, შესაბამისად მოხდა ის, რომ ძალიან ბევრი ახალი კომპანია წამოვიდა და სხვა ქალაქებშიც დაიწყო აქტიური მშენებლობები. კადრების გადინებაც მოხდა. ასევე დავასახელებ იმასაც, რომ არსებულ კადრებს არ გააჩნიათ ის უნარები, რასაც სამშენებლო სფერო მოითხოვს და სწორედ უნარების შეუსაბამობაა მესამე მიზეზი იმისა, რომ ვერ ვპოულობთ სწორი კვალიფიკაციის კადრებს.
ვფიქრობ, რომ დიდმა კომპანიებმა ხელი უნდა შევუწყოთ, ავიყვანოთ მინიმალური ბაზით კადრები და შემდეგ მოვამზადოთ და გავზარდოთ შიგნით. რეალურად ესეც იყო ერთ-ერთი მოტივაცია იმისაც, რომ ასეთი ფორუმი გაგვეკეთებინა,“- განაცხადა ნინო მესაბლიშვილმა.
მესაბლიშვილის თქმით, სამშენებლო სექტორის ფორუმის შედეგიანობის შესაფასებლად, სამომავლოდ კომპანიებისგან ელოდებიან სტატისტიკას თუ რამდენი თანამშრომელი თუ სტაჟიორი აიყვანეს ამ ფორუმის მეშვეობით.
„როცა ადგილზევე გავესაუბრე რამდენიმე კომპანიას, თქვეს, რომ იყო დადებითი უკუკავშირი და რამდენიმე კანდიდატი ძალიან მოეწონათ,“ - აღნიშნა ნინო მესაბლიშვილმა. მისი თქმით, გეგმაშია რომ ფორუმი ყოველწლიურად გაიმართოს.
კითხვაზე, თუ რა პოზიციებზეა მოთხოვნა და რამდენად მაღალანაზღაურებადია სამშენებლო სექტორი, CMC-ის ბიზნესისა და ორგანიზაციული განვითარების დირექტორი ამბობს, რომ სექტორი საკმაოდ მაღალანაზღაურებადია და ბაზრის ყოველწლიური ზრდის შესაბამისად იზრდება სახელფასო ზღურბლიც.
„პოზიციებს რაც შეეხება, პროექტის მენეჯერი და ტექნიკური კადრები არის ყველაზე რთული - ინჟინრები, მექანიკოსები, ელექტრიკოსები და ასე შემდეგ. მუშახელიდან დაწყებული ყველა კადრი ძალიან ჭირს, განსაკუთრებით ტექნიკური კადრები. ეს არის მწარე რეალობა, მენეჯერულ კადრებშიც დეფიციტი გვაქვს,“- აცხადებს ნინო მესაბლიშვილი.
როგორც CMC-ის წარმომადგენელი ამბობს, ფორუმზე მიწვეული იყო ტექნიკური და პროფესიული სასწავლებლების წარმომადგენლებიც და მათი მხრიდანაც დიდი იყო დაინტერესება. თუმცა რაც შეეხება ამ სასწავლებლიდან კადრების მოზიდვას, ნინო მესაბლიშვილის თქმით, ქვედა რგოლებში ეს შესაძლებელია, თუმცა დიდ პროექტებში და ტენდერებში მონაწილეობისას ტექნიკური კადრების ზედა რგოლებზე, მოთხოვნა უმაღლესი განათლების მქონე პირებზეა.