პანდემიურ პერიოდში, როცა უძრავი ქონების პერსპექტივა ჯერ კიდევ ბუნდოვანი და გაურკვეველი იყო, კომპანია ,,არსმა“ მეტროსადგური „სამგორის“ მიმდებარედ, ყოფილი კომბინატის ტერიტორიაზე საცხოვრებელი კომპლექსის „შენი სახლი სამგორში“ მშენებლობა დაიწყო. პროექტი უბნის კონცეფციას ემყარება. ამ ეტაპზე 3 კორპუსის მშენებლობა თითქმის დასრულებულია. როგორც ,,არსის“ აღმასრულებელი დირექტორი ბესო ორთოიძე ,,კომერსანტთან“ აღნიშნავს, პროექტი სულ 17 კორპუსის მშენებლობას ითვალისწინებს და კომპანიის მიერ შესრულებული პროექტების - „შენი სახლი ჯიქიაზე“ და „შენი სახლი კიკვიძის ბაღთან“ კონცეფციის ანალოგიურია.
,,2020 წლის ბოლოს, როცა სუბსიდირების პროგრამა აქტიურად მუშაობდა, ჩვენ დავიწყეთ ახალი პროექტი,,შენი სახლი სამგორში“. სამშენებლო სამუშაოები 2021 წელსაც გაგრძელდა, ფაქტობრივად არ გავჩერებულვართ. პანდემიურ პერიოდში ახალი პროექტების დაწყება მარტივი არ იყო, მაგრამ სტაბილურობის შესანარჩუნებლად და მომხმარებლების ნდობის გასამყარებლად ამ ნაბიჯის გადადგმამ და რისკმა გაამართლა. ჩვენ მივიღეთ სერიოზული და თამამი გადაწყვეტილება ახალ პროექტებთან დაკავშირებით, რასაც აქვს გადამწყვეტი მნიშვნელობა. ამას ხედავს მომხმარებელიც, რომელიც გადაწყვეტილების მიღების პროცესში დიდ მნიშვნელობას ანიჭებს კომპანიას, რომელიც, მისი აზრით, ფინანსურად გამართულია, არ უშინდება გამოწვევებს და სტაბილურად ვითარდება. ჩვენ ეს საკუთარი მაგალითით დავადასტურეთ. პროექტი ჯამში 17 კორპუსისგან შედგება, უკვე მესამე სახლის მშენებლობა მიმდინარეობს და მეოთხე სახლის მშენებლობას ვიწყებთ. ეს არის 8 სართულიანი შენობები, საკმაოდ კეთილმოწყობილი ეზოთი და გამწვანებით, მსგავსი მასშტაბის პროექტი სამგორის რაიონში არ განხორციელებულა“, - აცხადებს ,,კომერსანტთან“ ბესო ორთოიძე.
იქიდან გამომდინარე, რომ შენობები მრავალსართულიანი არ არის, შესაბამისად, თვითღირებულება მეტია. როგორც ორთოიძე ამბობს, შედარებით დაბალი კორპუსები დაახლოებით 50 დოლარით ძვირია, ვიდრე ნებისმიერი სხვა სახის მშენებლობა.
რაც შეეხება ფასს, ,,არსის“ აღმასრულებელი დირექტორის ინფორმაციით, 1 წელიწადში მშენებლობის ღირებულება დაახლოებით 120 დოლარით არის გაძვირებული.
,,2020 წელს, როცა პროექტის ,,შენი სახლი სამგორში“ მშენებლობა დაიწყო, ფასი 530 დოლარს შეადგენდა, ხოლო 2021 წლის ბოლოს 650 დოლარს გადააჭარბა. ჩვენი პროექტების ერთ-ერთი მთავარი დამახასიათებელი ნიშაა, რომ კაპიტალიზაცია სწრაფად იზრდება. გამომდინარე იქიდან, რომ ეტაპობრივად რამდენიმე სახლს ვაშენებთ, ყოველი ახალი გაცილებით ძვირია, ვიდრე წინა. გარდა ამისა, გასულ წელს სამშენებლო მასალები 30-35%-ით გაძვირდა, რაც დროთა განმავლობაში ფასებზეც აისახება. ჯერჯერობით სხვაობა 10%-ის დონეზეა“, - ამბობს ,,კომერსანტთან“ ბესო ორთოიძე.
ცნობისთვის, პროექტი ,,შენი სახლი სამგორში“ ქართულ-ესტონური ინვესტიციით ხორციელდება და ჯამური ღირებულება დაახლოებით 100 მლნ ლარია.
ინვესტიციის მოცულობა პარტნიორებზე თანაბრად ნაწილდება.
მთლიანად პროექტის სრულად დასრულებას 3 წელი დასჭირდება.
17 ახალი საცხოვრებელი კორპუსი 1000 ბინაზეა გათვლილი.
მარი ჩიტაია