აშშ-ის ვაჭრობის სამინისტრო რუსეთისა და ბელარუსის 120 ორგანიზაციის მიმართ ექსპორტზე შეზღუდვების დაწესებას გეგმავს.
„რადიო თავისუფლების“ ცნობით, შესაბამისი დოკუმენტი აშშ-ს ფედერალური რეესტრის ვებგვერდზე გამოჩნდა, მისი გამოქვეყნება 7 აპრილს იგეგმება.
სიაში მოხვდნენ ორგანიზაციები, რომლებიც დაკავშირებული არიან თავდაცვის, აერონავტიკისა და საზღვაო სექტორთან. მათ შორისაა ოპტიკური და ფიზიკური გაზომვების რუსული კვლევითი ინსტიტუტი, მოსელექტრონპროექტი, „ზვეზდას“ გემთმშენებელი ქარხანა, ჟუკოვსკის სახელობის ცენტრალური აეროჰიდროდინამიკური ინსტიტუტი და სხვა.
გარდა ამისა, სიაში შედის ბელორუსის კგბ-ს განყოფილება ალფა, გომელის რეგიონალური აღმასრულებელი კომიტეტის შინაგან საქმეთა დეპარტამენტი და ბელარუსის შინაგან საქმეთა სამინისტროს ჯარები.
დოკუმენტის მიხედვით, ეს სტრუქტურები „ეროვნული უსაფრთხოების ან აშშ-ის საგარეო პოლიტიკის ინტერესების საწინააღმდეგოდ მოქმედებდნენ“.
რუსეთ-უკრაინის ომი
