აშშ-ის ხელისუფლება იპოვის ყველას, ვინც სანქცირებულ რუს ოლიგარქებს აქტივების დამალვაში დაეხმარება. ამის შესახებ აშშ-ის ხაზინის მდივნის მოადგილე უოლი ადიეომ ლონდონში, Chatham House-ში განაცხადა.
მისი თქმით, მარტში, სანქცირებული პირების გაკონტროლების კოორდინაციისთვის საერთაშორისო ჯგუფი, REPO (Russian Elites, Proxies, and Oligarchs) შეიქმნა, რომელიც ოლიგარქების გადამალულ ქონებასა და მათ ხელშემწყობ პირებს ავლენს.
„სანქციებში მოყოლილი პირებიდან ბევრი ცდილობს აქტივების გადატანას, რომ პასუხისმგებლობა თავიდან აიცილოს. მინდა, ვუთხრა მათ, ვინც უკანონოდ მოპოვებული სიმდიდრის გადამალვაში ამ ელიტის დახმარებაზე ფიქრობს: ჩვენ აუცილებლად გიპოვით! ჩვენ მზად ვართ, დავაწესოთ სანქციები მათ წინააღმდეგაც, ვინც სანქციების ქვეშ მყოფი რუსული ელიტის მხარდაჭერას უზრუნველყოფს“, - აცხადებს უოლი ადიეო.
მისი თქმით, გლობალურ ფინანსურ სისტემასთან რუსეთის წვდომის შეზღუდვისთვის, 2001 წლის სექტემბრის შემდეგ, „უპრეცედენტო ზომები“ იქნა მიღებული, რაც კოლექტიურ საფრთხეზე ყველაზე ძლიერი კოორდინირებული საერთაშორისო პასუხია. ადეიო ვარაუდობს, რომ ამ ზომების შედეგად, რუსეთის მშპ-ს „998 წლის შემდეგ ყველაზე მკვეთრი ვარდნა ექნება. 1998 წელს რუსეთის მშპ 5,3%-ით შემცირდა. მისი თქმით, რუსეთის ცენტრალური ბანკის ძირითადი განაკვეთის 9.5%-დან 20%-მდე სწრაფი ზრდა ეკონომიკურ აქტივობაზე „დრამატულად“ იმოქმედებს.
„დღეს რუსეთის ხელისუფლება ცდილობს, ფინანსურ კრიზისს კაპიტალზე კონტროლის დრაკონული მეთოდებით გაუმკლავდეს, რომ უცხოელ ინვესტორებს ქვეყნიდან ფული არ გაატანონ, ხოლო უცხოური ვალუტის ოდენობა შეზღუდონ, რადგან რიგითი მოქალაქეები თავიანთი საბანკო ანგარიშებიდან უცხოურ ვალუტას ხსნიან და ვისაც შეუძლია, რაც შეიძლება, მალე გააქვს ქვეყნიდან,“ - აცხადებს ხაზინის მდივნის მოადგილე.