შეერთებულმა შტატებმა სანქციების ქვეშ მყოფ რუსულ სტრუქტურებთან ენერგეტიკის დაფინანსების ოპერაციებზე ლიცენზიის მოქმედების ვადა გაახანგრძლივა. ამის შესახებ განცხადება აშშ-ის ხაზინის დეპარტამენტის საგარეო აქტივების კონტროლის ოფისმა (OFAC) თავის ვებგვერდზე გაავრცელა.
ლიცენზია ძალაში მიმდინარე წლის 5 დეკემბრამდე იქნება. ის თებერვალში გამოიცა და 24 ივნისამდე მოქმედებდა. იმ ორგანიზაციების სიაში, რომლებთანაც ტრანზაქციები არის დაშვებული რუსეთის ცენტრალური ბანკი, ასევე, VEB.RF, „სბერბანკი,“ VTB, „სოვკომბანკი,“ „ოტკრიტიე,“ „ალფა-ბანკი“ და მათ მიერ კონტროლირებადი სტრუქტურები შედის.
ლიცენზია ნავთობის, გაზისა და სხვა ენერგეტიკული რესურსების მოპოვების, წარმოების, გადამუშავების, გათხევადების, გაზიფიკაციის, რეგაზიფიკაციის, კონვერსიის, გამდიდრების, დამზადების, ტრანსპორტირებისა და შესყიდვის ოპერაციებს შეეხება. ის, ასევე, ნებისმიერი, მათ შორის ბირთვული, თერმული და განახლებადი წყაროდან ელექტროენერგიის გენერაციის, წარმოების, შემუშავებისა და გადაცემა-გადაცვლის უფლებას იძლევა.
მაისის ბოლოს აშშ-ის ხაზინამ აღარ განაახლა გენერალური ლიცენზია, 9C , რომელიც რუსეთს თავისი საგარეო ვალის მომსახურების საშუალებას აძლევდა. Bloomberg მაშინ წერდა, რომ ეს რუსეთს დეფოლტამდე მიიყვანდა, თუმცა მისი თავიდან აცილების გზებიც არსებობს. 1917 წლის რევოლუციის შემდეგ რუსეთს საგარეო ვალის დეფოლტი არ დადგომია.
1-ელ ივნისს ევროპის, ახლო აღმოსავლეთისა და აფრიკის საკრედიტო დერივატივების განსაზღვრის კომიტეტმა (CDDS EMEA) რუსეთის სახელმწიფო ვალზე „გადაუხდელობის“ აღიარებას მხარი დაუჭირა.
ლიცენზია
