აშშ-მა თურქეთი რუსეთში ქიმიური ნივთიერებების, მიკროჩიპებისა და სხვა პროდუქციის ექსპორტთან დაკავშირებით გაფრთხილა, რასაც მოსკოვი, შესაძლოა, იყენებდეს უკრაინაში თავისი საომარი ძალისხმევისთვის.
როგორც სააგენტო „როიტერი“ ვაშინგტონმა, შესაძლოა, იმ თურქული კომპანიების, ბანკების დასასჯელად, რომლებიც რუსეთის წინააღმდეგ დაწესებულ სანქციებს არღვევენ ზომებს მიმართოს.
ხუთშაბათს და პარასკევს თურქეთში აშშ-ის სახაზინო დეპარტამენტის სანქციებზე მომუშავე განყოფილების ხელმძღვანელი ბრაიან ნელსონი იმყოფებოდა, რომელიც თურქეთის მთავრობისა და კერძო სექტორის წარმომადგენლებს შეხვდა და მათ რუსეთისთვის პროდუქციის მიწოდების აღკვეთის კუთხით მეტი თანამშრომლობისკენ მოუწოდა.
ბანკირებთან შეხვედრაზე ნელსონმა განაცხადა, რომ რუსეთში წლიური ექსპორტის ზრდა თურქულ კომპანიებს მოწყვლადს ხდის რეპუტაციული და სასანქციო რისკების წინაშე ან „დიდი შვიდეულის“ ბაზრებზე წვდომის დაკარგვის საფრთხის წინაშე აყენებს.
„როიტერს“ აშშ-ის მთავრობაში ანონიმურმა წყარომ განუცხადა,რომ ანკარასა და სტამბოლში გამართული შეხვედრებისას ნელსონმა და სახაზინო დეპარტამენტის დელეგაციამ ხაზი გაუსვეს რუსეთში თურქეთიდან ათობით მილიონი დოლარის ღირებულების პროდუქციის ექსპორტს, რაც შეშფოთებას იწვევს.
„როიტერის“ მასალაში ნათქვამია, რომ რუსეთის საბაჟო მონაცემების მიხედვით, 31 ოქტომბრამდე, შვიდი თვის განმავლობაში, რუსეთში შევიდა 2,6 მილიარდი დოლარის ღირებულების კომპიუტერები და სხვა ელექტრონული კომპონენტები. ამ პროდუქციიდან, სულ მცირე, 777 მილიონის ღირებულების მასალები დასავლური კომპანიების მიერ იყო წარმოებული, რომელთა ჩიპებიც რუსეთის შეიარაღების სისტემებშია აღმოჩენილი.