ენტონი ბლინკენმა უკრაინისა და
ევროპელი მოკავშირეებისთვის აშშ-ის სამხედრო დახმარების ახალი პაკეტი, 3,75 მილიარდი დოლარის ოდენობით გამოაცხადა.
ამ პაკეტიდან თითქმის 700 მილიონი ევროპელი პარტნიორებისთვის არის განკუთვნილი, უკრაინისთვის გადაცემული იარაღისა და სამხედრო აღჭურვილობის კომპენსაციის სახით.
ბლინკენის განცხადებიდან ცოტა ხანში პენტაგონმა ახალი პაკეტის დეტალები გამოაქვეყნა. მასში უშუალოდ უკრაინისთვის შევა 50 ქვეითთა საბრძოლო მანქანა Bradley; 500 ტანკსაწინააღმდეგო ქვემეხი და მათთვის 250 ათასი ჭურვი; 55 დაჯავშნილი მანქანა MRAP-ი ნაღმსაწინააღმდეგო დაცვით; 100 ჯავშანტრანსპორტიორი M113; „მიწა-ჰაერი“ კლასის საზენიტო რაკეტები Sea Sparrow, რომლებიც მოდერნიზებულია „ბუკის“ საზენიტო-სარაკეტო კომპლექსებიდან გასაშვებად; 138 მაღალი გამავლობის ტაქტიკური მანქანა Hummer-ი; სისტემა HIMARS-ისთვის განკუთვნილი რაკეტები; ასევე სხვადასხვა სახის ჭურვები საჰაერო თავდაცვისა და მაღალი მობილურობის საარტილერიო სარაკეტო სისტემებისთვის, ტყვიამფრქვევები, სნაიპერული შაშხანები და სხვა იარაღი.
უკრაინის პრეზიდენტის ოფისის ხელმძღვანელმა ანდრი ერმაკმა „ტელეგრამში“ დაადასტურა, რომ უკრაინა მიიღებს ჯავშანტექნიკას, რაკეტებს Sea Sparrow და რაკეტებს HIMARS-ისთვის. „გამარჯვების წელი ჯერ მხოლოდ იწყება,“ დაწერა მან.
დღეისთვის უკრაინისთვის და მისი მხარდამჭერი ქვეყნებისთვის აშშ-ის მიერ გაწეული სამხედრო დახმარება 24,9 მილიარდ დოლარს შეადგენს, აღნიშნულია ბლინკენის განცხადებაში.
უკრაინისთვის აღმოჩენილი დახმარების მიხედვით, აშშ-ს მოსდევენ დიდი ბრიტანეთი, გერმანია, კანადა და პოლონეთი.
მსოფლიოს არმიების ახალ რეიტინგში, რომელიც Global Firepower-მა (GFP) შეადგინა, უკრაინა პირველად შევიდა პირველ 15 ქვეყანაში. მან გაუსწრო ირანს, ისრაელს, ავსტრალიას, საუდის არაბეთს, ესპანეთს, ტაივანსა და გერმანიას. შარშან უკრაინის არმია მსოფლიოში 22-ე ადგილზე იყო.