„როგორც კი, აშშ აწევს საპროცენტო განაკვეთებს, განვითარებადი ქვეყნები საინვესტიციო მომხიბვლელობას კარგავენ“, -ამის შესახებ ფინანსისტმა, გიგა ბედინეიშვილმა რადიო ,,პალიტრასა“ და ,,პალიტრანიუსის“ გადაცემაში ,,საქმე“ განაცხადა.
თუმცა, მისი თქმით, აჟიოტაჟი ამ ამბის ირგვლივ გადაჭარბებულია, რადგან საქართველო არ იყენებს ძალიან დიდ რესურსს, რომლითაც ინვესტიციების მოზიდვა შეუძლია და არ შეიძლება, რამის ფედრეზერვის მიერ საპროცენტო განაკვეთების ზრდისათვის გადაბრალება.
,,იმ შემთხვევაში, თუ ფედერალური სარეზერვო სისტემა დაიწყებს საპროცენტო განაკვეთების ზრდას, რაც მალე მოხდება, მაშინ უპირატესობა, რომელიც განვითარებად ეკონომიკებს გვქონდა, აღარ იქნება. ვგულისხმობ, ინვესტიციებზე უკუგებებს და ა.შ. ამერიკელი ინვესტორის თვალით რომ შევხედოთ, ფული ჩავდო ჩემივე ქვეყანაში და ფაქტობრივად, ვერაფერი ვიშოვო, მაგას ხომ არ ჯობია, რომ ფული საქართველოში ჩავდო, სადაც საპროცენტო განაკვეთები მაღალია. როგორც კი, აშშ აწევს საპროცენტო განაკვეთებს განვითარებადი ქვეყნები ამ მომხიბვლელობას კარგავენ. ეს არის ამ ყველაფრის ლოგიკა, ფედერალური რეზერვების საპროცენტო განაკვეთის ზრდა, ახალი ბაზრების მომხიბვლელობას ამცირებს.
მე თუ მკითხავთ, აჟიოტაჟი ამ ამბის ირგვლივ გადაჭარბებულია. საერთოდ არ არის მოულოდნელი, რომ ზრდა იქნება. აშშ-ში სამარცხვინოდ დაბალი საპროცენტო განაკვეთებია, რაც ჩემი აზრით გაუმართლებელია. პანდემიის გამო პანიკის დროს იმდენად დაწიეს განაკვეთები, რომ აბსურდამდე მივიდა. აშშ-შიც და ევროპაშიც უარყოფითი რეალური საპროცენტო განაკვეთებია (რეალური ანუ მინუს ინფლაცია). შესაბამისად, იმისთვის, რომ ბანკში ფული შეინახო, ფაქტობრივად, იქით უხდი ბანკს ფულს.
ჩვენს ჭრილში რომ შევხედოთ, ფედრეზერვის მიერ საპროცენტო განაკვეთის ზრდა, საქართველოს საინვესტიციო მომხიბვლელობას შეამცირებს. თუმცა, არ უნდა დაგვავიწყდეს, რომ ისედაც ცუდ დღეში ვართ კაპიტალის მოზიდვის კუთხით. არაადეკვატური იქნება რამის ამ თემისთვის დაბრალება, იმდენი შეგვიძლია გავაკეთოთ მეტი ფინანსების მოსაზიდად. ჩვენ რაც შეგვიძლია ის უნდა გავაკეთოთ და არ ვიფიქროთ იმაზე, პაუელი რას აკეთებს“ - განაცხადა ბედინეიშვილმა ,,საქმეში“.
ინფორმაციისთვის, საერთაშორისო სავალუტო ფონდი განვითარებად ეკონომიკებს აფრთხილებს, მოემზადონ აშშ-ის ფედერალური სარეზერვო სისტემის მიერ საპროცენტო განაკვეთების გაზრდისთვის. როგორც ფონდში განაცხადეს, აშშ-ის ფედერალური სარეზერვო სისტემის ამ ნაბიჯს შესაძლოა, მოჰყვეს რყევები ფინანსურ ბაზრებზე, კაპიტალის გადინება და ვალუტების გაუფასურება.
BPN.GE
გიგა ბედინეიშვილი
