ქართულ ავიაკომპანია „ეარ ჯორჯიას“ ტრანსკონტინენტალური ფრენები გასულ აგვისტოში უნდა დაეწყო, თუმცა ბიუროკრატიული პროცედურების გამო, გაურკვეველი ვადით გადაიდო. კომპანიის დამფუძნებელი გიორგი კოდუა „ბიზნესპრესნიუსთან" ამბობს, რომ ტრანსკონტინენტური ფრენებისთვის სახელმწიფო მზად არ არის, პრობლემა კი ნების არარსებობაა.

„საქართველო ამ ეტაპზე ევროპული სტანდარტებით და რეგულაციებით მუშაობს და არ გვაქვს იმპლემენტირებული აშშ-ს ნორმები. ეს რომ, ჩვენ დავნერგოთ, საჭიროა, საქართველოს სამოქალაქო ავიაციის სააგენტომ დაიწყოს აშშ-ს სტანდარტების დანერგვა, რაც მუშაობის სტანდარტებს და უსაფრთხოებას ეხება. ამერიკის მხარე მზად არის ჩვენთან თანამშრომლობისთვის. საჭიროა, საქართველოს მხრიდან განაცხადის გაკეთება, რაც ამ დრომდე არ მომხდარა. მეორეს მხრივ, საჭიროა აეროპორტს ჰქონდეს გარკვეული უსაფრთხოების ზომები ადაპტირებული იგივე, როგორც ამერიკაშია. საუბარია სკანერებზე, დეტექტორებზე და სხვა სისტემებზე და დანადგარებზე, რომელიც აშშ-ს აეროპორტებთან უნდა იყოს ინტეგრირებული.

ეს ყველაფერი მარტივად მოგვარებადია განაცხადიდან 120 დღეში მისცემენ უფლებას აეროპორტების გაერთიანებას. 60 დღეში მოხდება აეროპორტების გაერთიანების განაცხადის შემოწმების დასრულება. მესამე კომპონენტია, კომპანიები, რომლებსაც 90 დღეში აძლევენ ფრენის უფლებას. ამ სამი აქტორიდან, კერძო სტრუქტურა, ჩვენი ავიაკომპანია წავიდა ყველაზე წინ და უკვე საქართველოში გვყავს საერთაშორისო სტანდარტების თვითმფრინავი, რომელსაც ტრანსკონტინენტური ფრენების შესრულება შეუძლია. ეს უნდა ყოფილიყო საბაბი, დაეწყოთ პროცედურა, მაგრამ ასე არ მომხდარა. მეტიც, მთხოვეს, რომ ამ ეტაპზე თავი შემეკავებინა აშშ-ს რეისების პროცედურების დაწყებისგან. სავარაუდოდ, ეშინიათ, რომ უბრალოდ ვერ გაივლიან ამ პროცედურებს. დამოუკიდებლად კომპანიას არ ძალუძს დაიწყოს ტრანსკონტინენტური ფრენა. ახლა რეალობა ასეთია. ვთვლი, რომ მთავარი ნების არარსებობაა, სხვა ყველაფერი საბაბია და არა მიზეზი“, - განაცხადა კოდუამ ,,ბიზნესპრესნიუსთან“.

ინფორმაციისთვის, „საქართველოს აეროპორტების გაერთიანების" დირექტორმა, თამარ არჩუაძემ ,,ბიზნეს ფორმულასთან" განაცხადა, რომ საქართველოსა და აშშ-ს შორის პირდაპირი ფრენების დანიშვნა უახლოეს მომავალში არ იგეგმება.

"აშშ-ში ფრენების დაწყება საკმაოდ კომპლექსური საკითხია. ამისთვის მზად უნდა იყოს არა მხოლოდ ავიაკომპანია, არამედ მთლიანად ქვეყანაც. უნდა ჩატარდეს აშშ-ს საავიაციო ხელისუფლების საერთაშორისო აუდიტი. შესაბამისად, ეს არის საკმაოდ გრძელვადიანი პროცესი და ამ ეტაპზე ეს პროცესი არ დაწყებულა", - აცხადებს თამარ არჩუაძე.

Bpn.ge