აშშ-ს პრეზიდენტის ჯო ბაიდენის ადმინისტრაციის წარმომადგენლების შეფასებით, რუსეთის პრეზიდენტმა ვლადიმერ პუტინმა, ნატოსთან ბირთვულ კონფრონტაციამდე, შესაძლოა ქიმიური იარაღი პირველად უკრაინაში გამოიყენოს. ეს იმ შემთხვევაში მოხდება, თუ რუსეთ-უკრაინის ომში რუსეთის ჯარის დანაკარგები გაგრძელდება, — ამის შესახებ Politico წერს.
Politico-ს ცნობით, ამ საკითხზე განცხადება ბაიდენის ადმინისტრაციის ექვსმა წევრმა გააკეთა. აღსანიშნავია ისიც, რომ შეერთებულ შტატებს არ გააჩნია დაზვერვის ინფორმაცია იმის შესახებ, რომ ასეთი თავდასხმა უკრაინაში გარდაუვალია. გარდა ამისა, აშშ-ის თავდაცვის დეპარტამენტის ბევრ ოფიციალურ პირს მიაჩნია, რომ საბრძოლო მოქმედებები ზამთრის თვეებში შეწყდება.
„ბრძოლის ველზე რუსული არმიის დანაკარგების გაგრძელების ან მისი სრული დაშლის შემთხვევაში, ზოგიერთი მაღალი თანამდებობის პირი მიიჩნევს, რომ მოსკოვმა შეიძლება ქიმიური იარაღი გამოიყენოს. მათ შორის ის ქიმიკატები, რომლებიც რუსეთმა ალექსეი ნავალნის მოწამვლისას გამოიყენა,“ — წერს Politico.
„ასეთი თავდასხმა შეიძლება დაკავშირებული იყოს ქიმიკატებთან, რომელთა დამალვაც ადვილია. ეს კი დასავლეთის ქვეყნებს მოსკოვის წინააღმდეგ ბრალდების წაყენებას გაურთულებს,“ — განაცხადა ერთ-ერთმა ოფიციალურმა პირმა.
განცხადებაში აღნიშნულია, რომ შეერთებულმა შტატებმა დიდი ხანია იცოდა იმის შესახებ, რომ რუსეთი ქიმიური იარაღის შექმნაში ინვესტიციას ახორციელებდა. ამერიკელი კონგრესმენის თანაშემწის თქმით, ამ შემოდგომაზე სენატორებს მიაწოდეს ინფორმაცია რუსეთის მიერ ქიმიური იარაღის მარაგებისა და უკრაინაში არსებული საფრთხეების შესახებ.
Politico იუწყება, რომ ბაიდენის ადმინისტრაცია ავითარებს გეგმებს იმის შესახებ, რომ გაიზარდოს ინვესტიციები მსგავსი ქიმიკატების ადრეული გამოვლენისა და დამცავი ნიღბების წარმოებისთვის.
კრემლისა და პირადად პუტინის ოფიციალურ განცხადებების მიხედვით, 2017 წლის სექტემბრიდან რუსეთის ფედერაციას ქიმიური იარაღი არ ჰქონდა და 40 000 ტონა საბჭოთა მარაგი განადგურდა, ნათქვამია Unian-ის სტატიაში, რომელიც Politico-ს განცხადებას ეძღვნება.
უკრაინული გამოცემა იმის შესახებაც წერს - რა უნდა გავაკეთოთ ქიმიური იარაღის გამოყენების შემთხვევაში:
მჭიდროდ დახურეთ ფანჯრები და კარები, სავენტილაციო ღიობები, ბუხრები;
ფანჯრების ბზარები დალუქეთ ქაღალდით ან ლენტით;
ჩართეთ ტელევიზორი ან რადიო დამატებითი ინსტრუქციებისთვის;
გააფრთხილეთ ახლობლები საფრთხისა და შესაძლო ევაკუაციის შესახებ;
გამორთეთ საყოფაცხოვრებო ტექნიკა და გაზი.
მოამზადა მაკა ბიბილაშვილმა