სავალდებულო ტექინსპექტირების რეფორმა რამდენიმე წლის წინ განხორციელდა. პანდემიური პროცესების პარალელურად მიმართვიანობა შემცირებული იყო, თუმცა ავტომობილების ინსპექტირების ორგანოების ასოციაციაში საუბრობენ გარკვეულწილად გადასახედია  ის ტარიფები, რაც  რეფორმისა და ტექინსპექტირებისთვის დასაწყისში დაწესდა. როგორც რადიო „კომერსანტის“ გადაცემაში „კომერსანტს  დილა“ ავტომობილების ტექინსპექტირების ორგანოების ასოციაციის თავმჯდომარემ ვაჟა იორდანიშვილმა განაცხადა, ტექინსპექტირებაზე ტარიფი 2018 წელს დაწესდა და დღეს ქვეყანაში არსებულ გაძვირებულ ფონზე გადახედვას საჭიროებს.

მისივე თქმით, გასათვალისწინებელია ის ფაქტორიც, რომ ყველა ცენტრი  საერთაშორისო  სტანდარტის შესაბამისად  არის  აღჭურვილი, რაც ნიშნავს და გულისხმობს იმას, რომ  შენობა-ნაგებობები პერსონალი, ხელსაწყოები და სხვა ყველაფერი საერთაშორისო სტანდარტებით გათვალისწინებულ მოთხოვნებს აკმაყოფილებს.

„ბაზარზე 42 ორგანიზაციაა, რომლებსაც 73 რესპუბლიკის მასშტაბით 73 ლოკაცია აქვთ. რაც შეეხება ტარიფებს მე გამიჭირდება იმის  თქმა რა და როგორ უნდა იყოს. კარგი იქნება თუ ამ მიმართულებით  შეიქმნება გარკვეული სამუშაოო ჯგუფი, რადგან ეს ტარიფი  დადგენილია მთავრობის მიერ და ბიზნესს არ აქვს საშუალება, რომ  გადახედოს ან თავისი ტარიფი დააწესოს. ამიტომ ვფიქრობ, რომ საჭიროა სამუშაო ჯგუფის შექმნა, რომლებიც იმსჯელებენ ამ  თემაზე. როდესაც დაწესდა ეს  ტარიფი რა იყო გათვალისწინებული მაშინ და  დღევანდელი მოცემულობით რა  ხარჯებთან  არის დაკავშირებული და რა თვითღირებულებაა, შესაბამისად  უნდა გავითვალისწინოთ მოსახლეობის ეკონომიკური მდგომარეობა, რომ ეს მათ დიდ ტვირთად არ დააწვეს“, - აღნიშნა ვაჟა იორდანიშვილმა.

იორდანიშვილის თქმით, პრობლემა კომპლექსურია და ყველაზე მთავარი ამ პრობლემაში არის მიმართვიანობა. საქართველოში რეალურად მილიონ ნახევარი ავტოსატრანსპორტო საშუალებაა და ტექინსპექტირებას 750 000 გადის.

„ავტომანქანების დანარჩენი ნაწილი დიდი ალბათობით არ გადის ტექინსპექტირებას და  ჯარიმებით გადაადგილდება, ისიც თუ  დაიწერა, რადგან ვიცით რომ ჭკვიანი კამერები გაუმართავად მუშაობენ, მაგრამ ის  რასაც გზებზე ვხედავთ, ანუ ავტომობილებს, რომლებსაც მოჭარბებული კვამლი აქვთ და გაუმართავია ეს დიდი ალბათობით ის სატრანსპორტო საშუალებებია, რომელიც  ტექინსპექტირებას არ  გადიან. რაც შეეხება გამონაბოლქვს ეს ძალიან სერიოზული პრობლემა და საპირწონეზე დგას ავტომობილს გამოსწორება გამართულობა და ყველა ჩვენგანის ჯანმრთელობა. დაბინძურებული ჰაერის 70%-ი სწორედ ავტომობილებზე მოდის.

აქედან გამომდინარე ჩვენთან ტექინსპექტირების  რეგლამენტში გვიწერია, რომ  თუნდაც  ჯდებოდეს პარამეტრები დასაშვებ ნორმებში, მაგრამ ჰქონდეს ხილული კვამლი ან მოჭარბებული კვამლიანობა, ასეთი სატრანსპორტო საშუალება ტექინსპექტირებას ვერ გადის.

სხვათაშორის კანონპროექტი შეტანილია და განიხილავენ, რომ ხილული კვამლი გახდეს  დაჯარიმებადი. ეს  რა თქმა უნდა ძალიან მნიშვნელოვან ბერკეტი იქნება და მნიშვნელოვნად  გამოასწორებს მდგომარეობას, რადგან თუ მომართვიანობა გაიზრდება და  ყველა ავტომობილი გაივლის ტექინსპექტირებას და გზაზე კონტროლიც გამკაცრდება ეს მყისიერ  შედეგს მოგვცემს“, - აღნიშნა ვაჟა იორდანიშვილმა.

იორდანიშვილმა ასევე აღნიშნა, რომ ტარიფების  გადახედვის კუთხით  ჯერჯერობით არანაირი კომუნიკაცია და მოლოდინები არ არის.

თაკო კვაჭანტირაძე