რა პრობლემებს ქმნის საქართველოში მოქმედი ყველა დიდი წისქვილკომბინატის მუშაობის შეჩერება? - მიზეზებზე „კომერსანტის დილის“ ეთერში  ხორბლის მწარმოებელთა ასოციაციის ხელმძღვანელმა ლევან სილაგავამ ისაუბრა.

როგორც ცნობილია, ხორბლის მწარმოებლები ამბობენ, რომ წისქვილკომბინატების მუშაობის  შეჩერება გამოწვეულია იმით, რომ  ხორბალზე იმპორტის დროს დაწესებულია მცურავი ბაჟი, ხოლო ფქვილზე ეს არის 0%.

„დღეს ერთ ტონა ხორბალზე ბაჟის  საფასური არის 120$ და ეს  დისბალანსი  იწვევს  იმას, რომ ფქვილის  იმპორტმა ადგილობრივი წისქვილკომბინატების მიერ გამომუშავებული ფქვილის წარმოება ჩაანაცვლა, შედეგად საქართველოში არსებული ფაქტობრივად  ყველა წისქვილკომბინატი გაჩერებულია“, - აღნიშნა ლევან სილაგავამ.

„თუ მარტში ადგილობრივი  წისქვილის ფქვილის ფასი იყო  70 ლარი, ხოლო იმპორტირებულის 67 ლარი,  ერთ თვეში  დაეწია  და  გადააჭარბა,  შესაბამისად  ჩვენ ეს სხვაობა გვაქვს ამოსავსები. ამიტომ ჩვენ ვიღებთ ვალდებულებას, რომ  თუ კი დამაბალანსებელი  გადასახადი  შემოვა, ფქვილის ის  რაოდენობა, რომელიც ფართო მოხმარების პურის ფასისთვის არის განკუთვნილი, მივაწოდოთ  ქარხნებს  ფიქსირებულ  ფასად. რაც საშუალებას მისცემთ, რომ პური არ  გაძვირონ“, - აღნიშნა ლევან  სილაგავამ. 

სილაგავას  განმარტებით ხელისუფლების მხრიდან ამ პრობლემის მოგვარებისადმი მზაობა არის. ხორბლის მწარმოებელთა ასოციაცია და ხელისუფლება ახლა იმ  წერტილში არიან, სადაც  ბალანსის დაჭერა შესაძლებელია.

„აუცილებელია  წისქვილკომბინატების  მუშაობა. რადგან პურის  მწარმოებლებსაც მიაჩნიათ, რომ ადგილობრივი  წისქვილკომბინატების მუშაობის  შედეგად ფქვილის მიწოდება უფრო სტაბილურია. ახლა  ცოტა  ქაოტურად  ხდება ეს  ყველაფერი, იმიტომ  რომ ფქვილი შემთხვევითი პრინციპით მოდის, რაც  ტექნოლოგიურ  პროცესს  აფერხებს.  ანუ მიწოდება სავაჭრო  პარტიებად არ  არის  ჩამოყალიბებული, რაც სერიოზულ პრობლემას ქმნის“, - აღნიშნა ლევან სილაგავამ.

როგორც  სილაგავამ განმარტა, სანამ  ერთნაირი საგადასახადო  პირობები  იყო, ბაზარზე 97% იყო ადგილობრივი  წისქვილკომბინატების  ფქვილი, ხოლო იმპორტირებული — 3%.

დღეს ასევე გავრცელდა ინფორმაცია, რომ მომავალი კვირიდან, კონკრეტულად რუსული წარმოების ფქვილის ფასი, შესაძლოა, ერთ ტომარაზე 82-83 ლარამდე გაიზარდოს, როდესაც დღეს მისი ღირებულება 78 ლარია. 

ცნობისთვის, ოფიციალური სტატისტიკით, აპრილში საქართველოში იმპორტირებულია 8 181 ტონა ხორბალი და მესლინი (2.9 მილიონი აშშ დოლარი), რაც 2021 წლის აპრილის მაჩვენებელზე, 31 140 ტონაზე (7 364 მილიონი აშშ დოლარი), 73%-ით ნაკლებია. წელსაც ქვეყანაში ხორბლის მთავარი შემომტანი რუსეთია - აპრილში ჩრდილოელი მეზობლისგან 8 117 ტონა ხორბალი ვიყიდეთ, რაც მთლიანი რაოდენობის 99%-ია. დანარჩენი 1% ყაზახეთსა და ავსტრიაზე მოდის.

თაკო კვაჭანტირაძე