ავღანეთში ხელისუფლებაში მოსული თალიბანი ყველას, ვინც ქვეყნიდან ისტორიულ ფასეულობებს და დოლარს გაიტანს, კანონის მთელი სიმკაცრით დასჯის.

ასეთი განცხადების იურიდიული სტატუსი ჯერ გაურკვეველია, რადგანაც ისტორიული ფასეულობებისგან განსხვავებით, ავღანეთში ამ დროისთვის უცხოური ვალუტის გატანის ამკრძალავი კანონი არ არსებობს.

თუმცა, ამის მიუხედავად, ეს ქაბულის ახალი ხელისუფლების ოფიციალური პოზიციაა - თანაც, აიკრძალა არა მხოლოდ ვალუტის და კულტურული ფასეულობების გატანა, არამედ კონტრაბანდული გზით, დეკლარირების გარე შეტანაც.

„ვატყობინებთ ყველა მოქალაქეს, რომ კატეგორიულად იკრძალება ისტორიული ფასეულობების და დოლარის კონტრაბანდა და ქვეყნიდან ნებისმიერი, საჰაერო, თუ სახმელეთო გზით, ნებისმიერი საბაბით გატანა. ყველა, ვინც შეეცდება ამ აკრძალვის უგულებელყოფას, კანონის მთელი სიმკაცრით დაისჯება“, - ნათქვამია „თალიბანის“ ოფიციალურ განცხადებაში.

მანამდე აშშ-მ შეწყვიტა დოლარის მიწოდება ავღანეთში, რათა დეფიციტურ ვალუტას თალიბები არ დაუფლებოდნენ.

ვაშინგტონმა ასევე დაბლოკა თალიბების წვდომა ავღანეთის მთავრობის იმ ანგარიშებთან, რომელსაც აშშ-ის ფედერალური სარეზერვო სისტემა და სხვა ამერიკული საფინანსო ორგანიზაციები მართავენ.

„ყველა აქტივი, რომელსაც ავღანეთის ცენტრალური ბანკი შტატებში ფლობს, თალიბებისთვის მიუწვდომელი იქნება“, - განაცხადა თეთრი სახლის ადმინისტრაციის წარმომადგენელმა. გადაწყვეტილება „თალიბანის“ მიერ ქაბულის აღებამდე რამდენიმე კვირით ადრე მიიღეს - იმ დროს, როდესაც ცხადი გახდა, რომ ეს გარდაუვალია და ამერიკა ავღანეთში ახალი გამოწვევების წინაში აღმოჩნდებოდა.

საუბარია მილიარდობით დოლარზე, რომელიც ამჟამად უკვე არარსებულ მთავრობას ეკუთვნის და ამერიკულ ბანკებში ინახება. გადაწყვეტილება სახელმწიფო დეპარტამენტის რეკომენდაციის საფუძველზე ფინანსთა სამინისტრომ და უცხოურ აქტივებზე კონტროლის სამმართველომ მიიღეს.

ის, რომ მსგავსი ნაბიჯები გადაიდგმებოდა, დიდი საიდუმლო არავისთვის ყოფილა - გადაწყვეტილების მიღებამდე რამდენიმე დღით ადრე თეთრი სახლის მრჩეველმა ეროვნული უსაფრთხოების საკითხებში ჯეიკ სალივანმა განაცხადა, რომ შტატებს ავღანეთზე ზემოქმედების ბევრი ბერკეტი გააჩნია.

მისი თქმით. შესაძლებელია „გარკვეული სანქციების ამოქმედება“, თუმცა არ დაუზუსტებია, რა ტიპის ზომებზეა საუბარი.

24 აგვისტოს თალიბებმა მთავრობის ჩამოყალიბების პროცესი დაიწყეს - კერძოდ, უკვე დაინიშნნენ ფინანსთა, განათლების, უმაღლესი განათლების და შინაგან საქმეთა ახალი მინისტრები, უშიშროების სამსახურის ახალი ხელმძღვანელი, ქაბულის მერი და ქაბულის პროვინციის გუბერნატორი.

ქვეყნის მართვისთვის „თალიბანი“ 12 გავლენიანი და ცნობილი ადამიანისგან შემდგარი საბჭოს შექმნას გეგმავს.

rbc.ru