ავსტრალიის ენერგეტიკის მინისტრმა, კრის ბოუენმა ახალი სამხრეთ უელსის შტატის მოსახლეობას, რომელშიც ქვეყნის უდიდესი ქალაქი, სიდნეიც შედის, მოუწოდა, განათება საღამოს ორი საათის განმავლობაში გამორთონ. ამის მიზეზი, BBC-ის ცნობით, ენერგეტიკული კრიზისია, რაც ფასების ზრდის გამო ავსტრალიის ელექტროენერგიის მთავარი საბითუმო ბაზრის გაჩერებამ გამოიწვია.
კრის ბოუენის წინადადებით, მოსახლეობამ ყოველ საღამოს, ორი საათის განმავლობაში ელექტროენერგია არ უნდა მოიხმაროს. მინისტრი ახალ სამხრეთ უელსში მცხოვრებ ადამიანებს სთხოვს, რაც შეიძლება, მეტი ელექტროენერგია დაზოგონ.
„თუ თქვენ გაქვთ არჩევანი, თუ როდის ჩართოთ ან გამორთოთ გარკვეული ნივთები, ნუ ჩართავთ მათ საღამოს 6-დან 8 საათამდე,“ - აცხადებს ბოუენი.
BBC-ის ცნობით, ავსტრალია ქვანახშირისა და თხევადი ბუნებრივი აირის ერთ-ერთი უდიდესი ექსპორტიორია მსოფლიოში, თუმცა გასული თვიდან ენერგეტიკულ კრიზისს ებრძვის. ქვეყანაში ელექტროენერგიის სამი მეოთხედი კვლავ ქვანახშირის გამოყენებით იწარმოება და მთავრობას დიდი ხანია, ადანაშაულებენ იმაში, რომ ემისიების შესამცირებლად განახლებად ენერგიაში ინვესტიციებს საკმარისად არ დებს.
ბოლო კვირების განმავლობაში ავსტრალია ერთდროულად ქვანახშირის მიწოდების შეფერხებას, ქვანახშირზე მომუშავე რამდენიმე ელექტროსადგურის გათიშვისა და ენერგიის გლობალური ფასების ზარდის გავლენას განიცდის.
წლის დასაწყისში ახალ სამხრეთ უელსსა და კვინზლენდში ქვანახშირის მაღაროებს წყალდიდობამ დაარტყა, ხოლო ტექნიკურმა პრობლემებმა ორ მაღაროში წარმოება შეაჩერა, რომლებიც ახალ სამხრეთ უელსში ქვანახშირზე მომუშავე, ბაზრის ყველაზე დიდ სადგურს ამარაგებენ. ამჟამად ავსტრალიაში ქვანახშირზე გამომუშავებული ელექტროენერგიის სიმძლავრის, დაახლოებით, მეოთხედი მოულოდნელი გათიშვისა და დაგეგმილი ტექნიკური სამუშაოების გამო გამორთულია.
ამასთან, ელექტროენერგიის ზოგიერთ მწარმოებელს ხარჯები მას შემდეგ გაეზარდა, რაც რუსეთის წინააღმდეგ სანქციების გამო ქვანახშირისა და გაზის გლობალურმა ფასებმა მოიმატა. ამ ყველაფერმა, BBC-ის შეფასებით, ხელი შეუწყო საბითუმო ბაზარზე ელექტროენერგიის ფასების მატებას, რაც მეგავატ საათზე 300 ავსტრალიურ დოლარს (173 ფუნტსა და 210 აშშ დოლარს) გადასცდა. ეს ზღვარი მარეგულირებლის, ავსტრალიის ენერგეტიკული ბაზრის ოპერატორის (Aemo) მიერ არის დადგენილი, რაც რამდენიმე გენერატორისთვის წარმოების ღირებულებაზე დაბალი აღმოჩნდა და მათ სიმძლავრის შეკავების გადაწყვეტილება მიიღეს.
გუშინ Aemo-მ ბაზრის შეჩერებით უპრეცედენტო ნაბიჯი გადადგა და განაცხადა, რომ პირდაპირ დააწესებს ფასებს და გენერატორებს დეფიციტს აუნაზღაურებს. მარეგულირებელმა, ასევე, ახალი სამხრეთ უელსის მომხმარებლებს სთხოვა, „ენერგიის მოხმარება დროებით შეამცირონ.“
ავსტრალია 
