ვენაში დააკავეს რუსული წარმოშობის საბერძნეთის მოქალაქე, რომელიც ეჭვმიტანილია რუსული სამხედრო დაზვერვისთვის ჯაშუშობაში. 39 წლის ეჭვმიტანილი რუსეთის შეიარაღებული ძალების გენერალური შტაბის მთავარი დირექტორატის ყოფილი ოფიცრის შვილია, რომელიც გერმანიასა და ავსტრიაში დიპლომატად მუშაობდა. ინფორმაციას ადგილობრივი მედია ავრცელებს ავრცელებს.
მედია გამოძიების მონაცემებზე დაყრდნობით აღნიშნავს, რომ 2018 წლიდან 2022 წლის დასაწყისამდე სავარაუდო აგენტი 65-ჯერ იმყოფებოდა რუსეთში, ბელარუსში, თურქეთში, საქართველოსა და სხვა ქვეყნებში.
მამაკაცი ინარჩუნებდა ურთიერთობას სხვადასხვა ქვეყნის დიპლომატებთან და დაზვერვის ჩინოვნიკებთან. ასევე, ის იმყოფებოდა მოსკოვში რუსეთის უკრაინაში შეჭრამდე და შემდეგაც. მამაკაცი სახელმწიფო საიდუმლოების გამჟღავნებაშია ბრალდებული.
ეჭვმიტანილის ბინაში ჩხრეკა მარტში ჩაატარეს. ოპერაციის დროს ამოიღეს მოსასმენი მოწყობილობები, დამცავი ტანსაცმელი, მობილური ტელეფონები, ლეპტოპები და პლანშეტები, რომლებზეც 10 მილიონამდე სხვადასხვა ფაილია აღმოჩენილი და შესწავლილი.
სავარაუდო ჯაშუშმა რუსეთის ფედერაციას მიაწოდა მონაცემები ავსტრიაში განწყობების შესახებ, ასევე ინფორმაცია საგარეო პოლიტიკის, საზოგადოებაში არსებული მდგომარეობისა და ქვეყნის უსაფრთხოების შესახებ.