ავსტრიის მთავრობამ და ოპოზიციურმა პარტია Neos-მა სავალდებულო ვაქცინაციის კანონპროექტი პარლამენტში ოფიციალურად წარადგინეს, რაც ვენამ სამი კვირის წინ დააანონსა. ინფორმაციას ავსტრიული გამოცემა Die Presse ავრცელებს.

კანონი მომავალი წლის 1-ლი თებერვლიდან ამოქმედდება და გეგმის მიხედვით, ორი წლის განმავლობაში იმოქმედებს.

სავალდებულო ვაქცინაციისგან 14 წლამდე ასაკის ბავშვები და ორსული ქალები თავისუფლდებიან, ასევე, ის პირები, ვინც COVID-19 არაუგვიანეს 180 დღის განმავლობაში გადაიტანეს და მოქალაქეები, რომლებიც ჯანმრთელობის მიზეზების გამო ვერ იცრებიან.

ვაქცინაციისგან გათავისუფლებაზე მოწმობის გაცემის უფლება მხოლოდ ზოგადი პრაქტიკის ექიმს, ასევე, დერმატოლოგს, გინეკოლოგს, თერაპევტსა და პედიატრს ექნებათ. თუ ექიმი ყალბ მოწმობას გასცემს, მას 3600 ევრომდე ადმინისტრაციული ჯარიმა დაემუქრება.

15 მარტიდან დაწყებული, ყოველკვარტალურად „ვაქცინაციის ბოლო ვადები“ უნდა დადგინდეს. ვინც ამ დადგენილ ვადაში არ აიცრება და ვაქცინაციისგან გათავისუფლებასაც არ ექვემდებარება, შემოკლებული პროცედურით, 600 ევრომდე დაჯარიმდება. გადაუხდელობის შემთხვევაში, ჯარიმა, უკვე ჩვეული პროცედურით, 3600 ევრომდე გაიზრდება. ჯარიმის ოდენობის დადგენის დროს პირის შემოსავლის მდგომარეობა აუცილებლად იქნება გათვალისწინებული, ხოლო თუ ის აიცრება, ჯარიმა უკუქმედებით მოეხსნება.

ვინც ვაქცინაციის მოთხოვნის იგნორირებას აცრისგან გათავისუფლების ყოველგვარი მიზეზის გარეშე გააგრძელებს, ყოველკვარტალურად დაჯარიმდება.

ავსტრიის მთავრობის ცნობით, კანონპროექტს, ასევე, მხარს უჭერს ორი ოპოზიციური პარტია, რაც იმას ნიშნავს, რომ მას პარლამენტი ადვილად დაამტკიცებს.

ავსტრია ევროკავშირის პირველი ქვეყანა გახდა, რომელმაც ვაქცინაციის საერთო მოთხოვნები გამოაცხადა.

bpn.ge