ავტომფლობელთა მესამე პირის პასუხისმგებლობის დაზღვევა, შესაძლოა მალე სავალდებულო გახდეს, შესაბამის საკანონმდებლო ცვლილებას მთავრობა პარლამენტს ხელახლა წარუდგენს. ეკონომიკის მინისტრი ლევან დავითაშვილი ვარაუდობს, რომ საკანონმდებლო ორგანო კანონს საგაზაფხულო სესიაზევე მიიღებს.
„მესამე პირის მიმართ სამოქალაქო პასუხისმგებლობის დაზღვევის კანონპროექტი პარლამენტში იყო შეტანილი, მაგრამ ეს წინა მოწვევის პარლამენტი იყო. მთავრობა თავიდან დააინიცირებს ამ კანონპროექტს და იგეგმება, რომ საგაზაფხულო სესიაზე იქნეს მიღებული. ეს ევროკავშირთან ასოცირების შესახებ ხელშეკრულების ფარგლებში აუცილებლად შესასრულებელი მოთხოვნაა”,- განაცხადა ლევან დავითაშვილმა.
სადაზღვევო სექტორი ეკონომიკის სამინისტროსთან აქტიურად თანამშრომლობს და იმედოვნებს, რომ კანონპროექტი საგაზაფხულო სესიაზე წარედგინება პარლამენტს და თუ ინდუსტრია მზად იქნება შემოდგომიდან უკვე ძალაში შევა.
„ველოდებით, რომ მთავრობა იტყვის საბოლოო სიტყვას ევროკავშირის მოთხოვნებიდან გამომდინარე ავტომფლობელთა პასუხისმგებლობის დაზღვევის საკითხზე. ეს დაზღვევა რისკების სამართავად დადგენილი მსოფლიო სტანდარტია, რაც ავტოსაგზაო შემთხვევის დროს მოქალაქის სამედიცინო ხარჯების შემცირების შედეგად საგრძნობლად განტვირთავს სახელმწიფო ბიუჯეტს. საგზაო შემთხვევის დროს მოხდება მომხმარებლების მაღალი ევროპული სტანდარტებით დაცვა, ხოლო ადამიანის სიკვდილისა და შრომისუუნარობის გამოწვევის შემთხვევაში მნიშვნელოვანი კომპენსაციით უზრუნველყოფა.
მესამე პირის მიმართ ავტომფლობელთა პასუხისმგებლობის სავალდებულო დაზღვევის შემოღება მხოლოდ ჯანდაცვის კუთხით დაახლოებით 40-50 მილიონი ლარის დაზოგვას გამოიწვევს“ - აღნიშნა დევი ხეჩინაშვილმა.
სადაზღვევო სექტორი ავტომფლობელთა მესამე პირის პასუხისმგებლობის დაზღვევის შემოღების შესახებ პარლამენტში ინიცირებული კანონპროექტის დამტკიცებას ოთხ წელზე მეტია ელოდება. კანონპროექტი პარლამენტში 2018 წლის 31 დეკემბერს დარეგისტრირდა, მოლოდინია, რომ პროცესი წელს დაიძვრება.