Hyundai-სა და Kia-ს გარკვეული მოდელის ავტომობილები ტექინსპექტირებას ვერ გადიან. პრობლემა იმაშია, რომ 2022 წლის 1 იანვრიდან თხევადი აირის  სისტემის მქონე ავტომობილების ტექინსპექტირება სავალდებულოა. კუსტარულად ჩამონტაჟებული ავზების შემთხვევაში ითვლება, რომ ექსპლუატაციის ვადა 10 წელია. თუმცა, რეგულაცია იმ ავტომობილებზეც ვრცელდება, რომლის ქარხნულად დამონტაჟებულ ავზებზეც ექსპლუატაციის ვადა მითითებული არ არის. შედეგად, ისინი (2012 წლამდე გამოშვებული ავტომობილები) შემოწმებას ვერ გადიან, მიუხედავად იმისა, რომ კორეაში გამოშვებული მოდელების არც ავზებზე და არც პასპორტში მითითებული არ არის, რომ ავზს ექსპლუატაციის ვადა გასული აქვს.

პრობლემის შესახებ „კომერსანტთან“ სწორედ ასეთი ავტომობილის მფლობელმა თათა დონაძემ ისაუბრა. მისი თქმით, ასეთივე გაურკვევლობის წინაშე არაერთი მძღოლი აღმოჩნდა. 

„დღეს ავტო-ტექინსპექტირების ცენტრები უარს აცხადებენ მსგავსი ტიპის საწვავის სისტემების დათვალიერებაზე, იმ არგუმენტით, რომ მათ კანონის თანახმად უკვე ამოწურეს ექსპლუატაციის ვადა და ყოველ მომდევნო წელს ასე გაგრძელდება. ავტომფლობელთა ლეგიტიმურ შეკითხვაზე, რატომ, რის საფუძველზე არ ატარებთ ინსპექტირებას, პასუხია - ეს უკვე ვადაგასული ბალონია. არსად, არც მწარმოებელ ქვეყანაში, არც თვითონ საწვავის რეზერვუარზე, არც საქართველოს კანონში არ არის ჩანაწერი, რომ ამ ბალონების ექსპლუატაცია შემოიფარგლება 10 წლით.  — აცხადებს თათა დონაძე.

ავტომობილების მფლობელები გამოსავალს კანონში  ჩანაწერის გაკეთებაში ხედავენ, რომ რეგულაცია ქარხნულად ჩამონტაჟებულ თხევადი აირის ავზებზე არ გავრცელდეს.

„ამ არაკომპეტენტურობისა, თუ საკანონმდებლო უზუსტობის შედეგად, ვიღებთ ასეულობით ავტომფლობელს, რომელთაც ეზღუდებათ  გადაადგილება,  იმის გამო რომ ვერ ვატარებთ  ტექინსპექტირებას, ვჯარიმდებით წარმოუდგენელი რაოდენობის ვიდეოჯარიმებით, რომელთა გადაუხდელობის შემთხვევაში კიდევ უფრო მეტი საურავები და ხარჯები გვერიცხება. მით უფრო, რომ  საუბარია ტრანსპორტზე, რომელიც ელექტრომობილების შემდგომ, შეიძლება ჩაითვალოს ყველაზე ეკომეგობრულად. “, - აღნიშნა  თათა დონაძემ.

 ათასობით მოქალაქე ეკონომიკის სამინისტროსა და სხვა შესაბამის უწყებებს დახმარებას სთხოვს.