ორკვირიანი შოკის შემდეგ საავტომობილო ბაზარი ძალებს იკრებს. დასავლეთ უკრაინის მიმართულებით გარკვეული ძვრები დაიწყო, თუმცა საომარი მოქმედებების დასრულებამდე სიტუაციის გამოსწორებაზე საუბარი ნაადრევია. როგორც ,,კავკასიის ავტოიმპორტის“ გენერალური დირექტორი გიორგი სურგულაძე ,,კომერსანტთან“ აცხადებს, რეექსპორტს ბაზარს უკრაინის სახით 20% მოაკლდა. ამდენივეთი შემცირდა საქართველოში შემოყვანილი ავტომობილების რაოდენობაც.
მიიღე ინფორმაცია უფრო სწრაფად „კომერსანტის“ Telegram-ზე.
,,უკრაინის მიმართულება მთლიანად გაჩერებულია. თუმცა მცირე გამოცოცხლება შეიმჩნევა დასავლეთ უკრაინის ნაწილში. ავტომობილების შეძენა დაიწყეს ამერიკიდან, ეტყობა, მიწყნარდა ამ ნაწილში სიტუაცია. საქართველოს ბაზარზეც ვითარება მეტნაკლებად დასტაბილურებულია და გაუმჯობესება მალე რეექსპორტსაც დაეტყობა. 2 კვირიანი შოკი მიიღო ბაზარმა, ახლა აღდგა ყველაფერი. თუმცა უკრაინაში გასაყვანი მანქანები ფოთისკენ გადავამისამართეთ. ჯამში 4 500 ავტომობილია, რომელიც უნდა შევუნახოთ უკრაინელებს, სანამ საომარი მოქმედებები არ დამთავრდება, ამისთვის ვემზადებით. ცხადია, ომის გამო უკრაინის მიმართულება განულებულია. რეექსპორტს 20% მოაკლდა, ამდენივეთი შეგვიმცირდა საქართველოში შემოყვანილი ავტომობილების რაოდენობაც. იქიდან გამომდინარე, რომ ქართულ ბაზარზე წარმოვადგენთ წამყვან კომპანიას, დაფიქსირებული მონაცემი მეტნაკლებად ასახავს საერთო მდგომარეობასაც, რაც ზოგადად საავტომობილო ბაზარზე შეიმჩნევა“, - ამბობს ,,კომერსანტთან“ გიორგი სურგულაძე.
რაც შეეხება ბოლო პერიოდში თურქეთის სანაპიროზე საზღვაო ნაღმის აღმოჩენასთან დაკავშირებით გავრცელებულ ინფორმაციას, სურგულაძის თქმით, სიმართლეს არ შეესაბამება და პრობლემა ძირითადად იყო გადაზიდვებთან დაკავშირებით, რაც გამოსწორდა.
,,სამი კვირის წინ თურქეთში საქართველოს მიმართულებით ფიდერებზე გადაზიდვები შეფერხდა. კერძოდ, ფიდერმა, რომელიც შავ ზღვაში მოძრაობს, გააუქმა ერთი ხაზი, სხვა მიმართულებით გადაერთო და ამიტომ მოხდა შეყოვნება. ეს სიტუაცია უკვე გამოსწორდა და პრობლემა არ არის. რაც შეეხება საზღვაო ნაღმებს, ინფორმაცია ვრცელდება საეჭვო წყაროების მიერ და სიმართლეს არანაირად არ შეესაბამება. ყოველდღიური კომუნიკაცია გვაქვს საზღვაო ხაზებთან და რამე ასეთი საფრთხის შემთხვევაში რეაქცია აუცილებლად ექნებოდათ. მსგავსი რამ არ დაფიქსირებულა“, - დასძენს გიორგი სურგულაძე.
ცნობისთვის, ,,კავკასიის ავტოიმპორტი“ ყველაზე მსხვილი ავტო იმპორტიორი კომპანია და უპირობო ლიდერია კავკასიის რეგიონში. 17–წლიანი წარმატებული ისტორიის განმავლობაში კომპანიამ მოახდინა 200 000-ზე მეტი ავტომობილის იმპორტი და რეალიზაცია, ჩამოაყალიბა ფილიალების ფართო ქსელი (43 ფილიალი) საქართველოსა და მსოფლიოს სხვადასხვა ქვეყანაში.
კომპანიის გაყიდვებში უკრაინის ბაზარს დაახლოებით 20% ეკავა.
რაც შეეხება თანამშრომლებს, უკრაიანაში მდებარე ,,კავკასიის ავტოიმპორტის“ ოფისებში 70 ადამიანი იყო დასაქმებული. ჯამში, კომპანიაში დასაქმებულთა რაოდენობა 280-ს შეადგენს.
მარი ჩიტაია