საქართველოში ავტომობილების გაქირავების ბიზნესზე ტურიზმის აღდგენამ დადებითად ვერ იმოქმედა. მიუხედავად იმისა, რომ მიმდინარე წლის 8 თვეში საქართველოში ტურიზმი პანდემიამდელ პერიოდთან შედარებით 65.3%-ით აღდგა და საერთაშორისო ვიზიტების რაოდენობამ მოიმატა, რასაც, წესით, მანქანების გაქირავებაზე მოთხოვნაც უნდა გაეზარდა, სექტორი დღეს მაინც რიგი პრობლემების წინაშე დგას.

„ბიზნესპრესნიუსი“ ამ საკითხთან დაკავშირებით ესაუბრა კომპანია Autoplus-ის დირექტორს, გიორგი ალბორაშვილს, რომლის თანახმადაც, ქვეყანაში ძალიან ცოტაა ისეთი ტურისტი, რომელიც ამ ძვირად ღირებულ სერვისს იყენებს და ვიზიტორების უმეტესობა ბინის დაქირავებაზე აკეთებს აქცენტს. გიორგი ალბორაშვილის თქმით, რუსეთის მიერ უკრაინაში შეჭრის შემდეგ კი, მის კომპანიაში ყველა ჯავშანი გაუქმდა, შემცირდა მოთხოვნა და სექტორი, ფაქტობრივად, ლიკვიდაციის პირას მივიდა.

„არც ფასი გაზრდილა და არც მოთხოვნა. ომის შემდეგ რუსეთიდან ტურისტად კი არ შემოვიდნენ, არამედ საცხოვრებლად. ავტოგაქირავების სერვისი ფუფუნებაა, კომფორტია და ამ სერვისის გამომყენებელი ძალიან ცოტა შემოვიდა ქვეყანაში, ძირითადად, ბინებს ქირაობენ და ეტყობა კიდევაც ეს მათ ფასებს.

ომის შემდეგ ჩვენი საქმე ცუდად წავიდა, დაქირავება ორჯერ და სამჯერ კი არ შემცირდა, არამედ ლიკვიდაციის პირას მივედით. თებერვლიდან მოყოლებული დამქირავებლების რაოდენობამ მკვეთრად იკლო. ომამდე, მაგალითად, 22 თებერვალს თუ 30 შეკვეთა მქონდა, 25 რიცხვიდან, ომის დაწყების შემდეგ, ყველა შეკვეთა გამიუქმდა“, - ამბობს გიორგი ალბორაშვილი.

Autoplus-ის დირექტორის თანახმად, ფასების კლებასთან ერთად გაიზარდა ხარჯები და ბევრს ბიზნესიდან გასვლაც კი მოუწია.

„პანდემიის დროს გავჩერდით, რეგულაციების გამო გაქირავების უფლება არ გვქონდა და ტურისტიც ვერ ჩამოვიდა. გაქირავების ფასები შეიძლება დღესაც იგივე იყოს, თუმცა მოგვემატა ხარჯები - მანქანის გამართვა, მწყობრში მოყვანა ახლა ბევრად უფრო მეტი ჯდება, ვიდრე მაშინ. მაგალითად, ადრე თუ 50 დოლარად ვაქირავებდით, დღეს 40-ად ვაქირავებთ და ეს მაშინ, როდესაც ხარჯები გაზრდილია.

არც სესხის პროცენტზე გვქონია შეღავათი. მართალია, 6 თვე არ გადაგვახდევინეს, თუმცა რა პროცენტიც იყო იმ 6 თვის განმავლობაში შემდეგ დამიმატეს. ჩემი სესხი მანქანების მხოლოდ ნახევარს შეეხებოდა და ეს პერიოდი რაღაცნაირად გადავაგორე, თუმცა იყვნენ ისეთები, ვინც სრულად სესხით იყო ჩართული. მათ ბაზრიდან გასვლა მოუწიათ, რადგან ვეღარ გაუძლეს და ადრე თუ 4-5 კონკურენტი მყავდა, ახლა მყავს ერთი. მანქანების რაოდენობის შემცირებაც მოგვიწია - 25 მანქანიდან 7-8 მანქანაზე ჩამოვედი და ძალიან დიდი ზარალი, უკუსვლა განვიცადე“, - უთხრა გიორგი ალბორაშვილმა “ბიზნესპრესნიუსს“.

წყარო: bpn.ge/