საქართველოში მსუბუქი ავტომობილების რეექსპორტის მაჩვენებელი 9-წლიან მაქსიმუმზეა. საქართველოს სტატისტიკის ეროვნული სამსახურის მონაცემებით, 2022 წლის 7 თვეში ქვეყანაში მსუბუქი ავტომობილების რეექსპორტმა 370.8 მილიონი დოლარი შეადგინა, რაც 2013 წლის შემდეგ (387.3 მლნ) ყველაზე მაღალია, 2021 წლის მაჩვენებელს, 248.3 მილიონს კი 49.3%-ით აღემატება.
საქართველოს 10 უმსხვილესი საექსპორტო ქვეყნის ჩამონათვალი შემდეგნაირია:
აზერბაიჯანი - 159.6 მლნ;
უკრაინა - 61.5 მლნ;
ყაზახეთი - 34.6 მლნ;
სომხეთი - 32.6 მლნ;
რუსეთი - 22.2 მლნ;
ყირგიზეთი - 17.8 მლნ;
ბელგია - 16.5 მლნ;
არაბთა გაერთიანებული საამიროები - 6.6 მლნ;
ტაჯიკეთი - 5.1 მლნ;
მოლდოვა - 2.6 მლნ.
რეკორდულ ნიშნულზეა იმპორტი - წელს ქვეყანაში 759.7 მილიონი დოლარის მსუბუქი ავტომობილები შემოვიდა, რაც, საქსტატის მონაცემებით, მინიმუმ 2009 წლის შემდეგ ყველაზე მაღალია და გასული წლის მაჩვენებელს, 509.6 მილიონს, 49%-ით აღემატება. უმსხვილესი შემომტანები აშშ, იაპონია, გერმანია, თურქეთი და კორეის რესპუბლიკა არიან.
კომპანია „რობანი მოტორსის“ დამფუძნებელი, ელგუჯა ჯამაგიძე „ბიზნესპრესნიუსთან“ საუბრისას განმარტავს, რომ რეექსპორტის ამგვარ ზრდას 2 მიზეზი, აქციზის გადასახადის ცვლილება და ძვირად ღირებული მანქანების შემოდინება განაპირობებს.
„რეექსპორტის ასეთ ზრდას 2 მიზეზი აქვს. თანხობრივ ზრდას განაპირობებს ის, რომ განბაჟების გადასახადი, აქციზი შეიცვალა - იყო 50 და გახდა 90 თეთრი. მეორე მიზეზი კი ისაა, რომ შემოდის იმ წლოვანების ავტომობილები, რომლებიც ძვირია. ამასთანავე, გაიხსნა სხვა ბაზრებიც, როგორებიცაა უზბეკეთი, ყირგიზეთი და სხვ.
ზოგადად, ჩვენ ავტომობილების შემოყვანა უფრო იაფი გვიჯდება, ვიდრე იმ ქვეყნებს, რომლებიც ჩვენგან ყიდულობენ, მხედველობაში მაქვს აზერბაიჯანი, სომხეთი და სხვ. მათ მიწოდების ნაკლები შესაძლებლობა აქვთ, არ აქვთ ისეთი წვდომა ბაზრებთან, როგორც საქართველოს. ჩვენ მანქანები, მათ შორის აღსადგენი, შემოგვყავს, გავმართავთ, რადგან ნაწილებიც შედარებით იაფი გვიჯდება და შემდეგ გაზრდილი ფასით გავყიდით. რეექსპორტის მაღალ დონეს სწორედ ეს განაპირობებს ქვეყანაში“, - ამბობს ელგუჯა ჯამაგიძე.
ავტომობილების ექსპორტს საქართველოს მთლიან ექსპორტში მნიშვნელოვანი წილი უჭირავს - 2021 წელს ამ მაჩვენებელმა 10.8% შეადგინა და უმსხვილეს საექსპორტო სასაქონლო ჯგუფებში მეოთხე ადგილი დაიკავა, მთლიანმა შემოსავალმა კი 456.5 მილიონ დოლარს გადააჭარბა.
ავტომობილები
