კომპლექსური მიდგომისთვის ავტოსკოლების რეფორმირება და ზოგადად ამ მიმართულების რეგულირებაა საჭირო, - მიიჩნევს „საქართველოს ტრანსპორტისა და გზების ასოციაციის“ ხელმძღვანელი.

როგორც „კომერსანტთან“ საუბრისას დავით მესხიშვილმა აღნიშნა, ავტოსკოლების მხრივ ქვეყანაში განუკითხაობაა, ამ საქმიანობის სერტიფიცირება არ ხდება და დღეს ავტოსკოლის გახსნა ნებისმიერი მსურველისთვისაა ხელმისაწვდომი.

„ჩემი აზრით, ავტომობილის ტექნიკური დეტალები ავტოსკოლაში უნდა ისწავლებოდეს და აქამდეც უნდა ესწავლებინათ. ავტოსკოლების შემთხვევაში არის განუკითხაობა და პრაქტიკულად რთული დასადგენია, დღეს ვინ წარმოადგენს ავტოსკოლას, იმიტომ რომ ეს საქმიანობა არ საჭიროებს ნებართვას.

ეს სფერო აბსოლუტურად დაურეგულირებელია და ისიც კი არ ვიცით, რომ ამ პროფილით რამდენი სუბიექტია დაკავებული. თქვენც „კომერსანტის“ ოფისში შეგიძლიათ დააწეროთ ავტოსკოლა, აიყვანოთ ერთი ინსტრუქტორი და თავადაც მიიღოთ მოსწავლეები. დღეს ასეთი კანონმდებლობა გაქვს, რაც არის დაუშვებელი. ევროპაში არავის აქვს უფლება, რომ ავტოსკოლის საქმიანობა ნებართვის გარეშე განახორციელოს. რატომ? ის, რასაც ინსტრუქტორები, თუ მასწავლებლები ასწავლიან მძღოლობის კანდიდატს, უკავშირდება ადამიანის სიცოცხლეს და ადამიანის სიცოცხლეს რაც უკავშირდება, ის სისტემები უნდა იყოს სახელმწიფოს მიერ რეგულირებული. აქ იგულისხმება, რომ უნდა იყოს ერთიანი სასწავლო პროგრამა, უნდა იყოს პედაგოგი კვალიფიციური/სეტიფიცირებული, უნდა იყოს პრაქტიკის ინსტრუქტორი, შესაბამისი ცოდნით აღჭურვილი და შესაბამისად, დადასტურებული საბუთით.

მთლიანად მოშლილია ეს სისტემა, მთლიანად მოშლილია სატარიფო სისტემაც. პირდაპირ გეტყვით, რომ სწავლების საფასური ხშირ შემთხვევაში საეჭვოდ დაბალიც კია, იმ მხრივ, რომ ვერც კი მიხვდებით, მართლა ავტოსკოლა თუ არის, ხარჯები მაინც ხომ უნდა დაფაროს. როგორ შეიძლება 30 ლარად ასწავლო 32 საათი? ანუ ესეც მოშლილია. საათებიც არ არის დადგენილი საბოლოოდ, რამდენი საათი უნდა ასწავლონ. არც ის არის დადგენილი, ვინმე აკონტროლებს თუ არა ამ საათების რაოდენობას. არც სასწავლო პროგრამაა, არც მატერიალურ-ტექნიკური ბაზები არსებობს. თუმცა მატერიალურ-ტექნიკურ ბაზას რომ თავი დავანებოთ, ზოგადად სწავლების პროცესი არის გაურკვეველი“, — განმარტავს „საქართველოს ტრანსპორტისა და გზების ასოციაციის“ ხელმძღვანელი.

მესხიშვილი ამბობს, რომ ავტოსკოლების რეფორმირების გარეშე რეალური შედეგების მიღწევა გაჭირდება, რადგანაც სწავლების ერთიანი სისტემა არ არსებობს.

„მე რომ მკითხოთ, თუ ჩვენ გვინდა, რომ მართლა რეფორმა გავატაროთ იმ დონეზე, რომ მართვის მოწმობა აიღოს ადამიანმა, რომელსაც მართლა აქვს შესაბამისი ცოდნა, ამისთვის ავტოსკოლების რეფორმირება არის გარდაუვალი აუცილებლობა.

პატიოსანი ავტოსკოლებიც  არსებობენ, თუმცა ძალიან ბევრია თვითმარქვია ავტოსკოლები, რომელიც ხრიკებით, კოდირების გზით ასწავლიან თეორიულ გამოცდაზე, როგორ აიღოთ მართვის მოწმობა. ევროდირექტივა ნიშნავს იმას, რომ მართვის მოწმობა გაიცემოდეს ისეთ ადამიანზე, რომელსაც შესაბამისი ცოდნა აქვს. ამიტომ ავტოსკოლების რეფორმირების გარეშე რეალური შედეგების მიღწევა გაგვიჭირდება. რეალური შედეგი კი არის ის, რომ საგზაო უსაფრთხოების სტანდარტი გაიზარდოს და  გზებზე დაღუპული  საშუალო ევროპულ მაჩვენებელზე 4-ჯერ მეტი  აღარ იყოს. ევროდირექტივის დანერგვა  უნდა ნიშნავდეს იმას, რომ საფუძვლიანი რეფორმა გაკეთდეს. საფუძვლიანი რეფორმა კი ნიშნავს ავტოსკოლების რეფორმირებას, ნიშნავს საგამოცდო სისტემების დახვეწას და ამ მიმართულებით ყველა თანამედროვე საგამოცდო ნაწილის გაზიარებას.“—  აცხადებს მესხიშვილი.