სააგენტოს “აწარმოე საქართველოში“ ხელშეწყობით, დღეის მდგომარეობით, შეიქმნა ან გაფართოვდა 494 საწარმო, 152 სასტუმრო და 6 ტურისტული სერვისის მიმწოდებელი ობიექტი. როგორც სააგენტოს მიერ გავრცელებული ინფორმაციიდან ირკვევა, აღნიშნული პროექტების ფარგლებში განხორციელდა 1.8 მლრდ ლარზე მეტი ინვესტიცია და სულ შეიქმნა 24 205 სამუშაო ადგილი.

,,2020 წელს ამოქმედდა საკრედიტო-საგარანტიო მექანიზმი, რომელიც გულისხმობს სესხის უზრუნველყოფას სესხის ძირი თანხის არაუმეტეს 90%-ის ოდენობით. პროგრამის ფარგლებში უკვე დაფინანსებულია 242 პროექტი. აღნიშნული პროექტები შექმნიან 4 418 სამუშაო ადგილს. ზემოხსენებული პროგრამების გარდა, სააგენტო 2015 წლიდან ახორციელებს მიკრო და მცირე მეწარმეობის საგრანტო პროგრამას, რომლის ფარგლებშიც დღემდე მხარდაჭერილია 6 911 პროექტი, რომელთა ჯამური ინვესტიციის მოცულობა შეადგენს 79 მლნ ლარს, სადაც ჯამში დაფინანსებულია 10 083 ბენეფიციარი და შეიქმნება 17 489 სამუშაო ადგილი“, - აღნიშნულია ინფორმაციაში.

მთავრობის ინიციატივით, 1-ლი სექტემბრიდან სააგენტოს „აწარმოე საქართველოში“ მხარდაჭერის ახალი მექანიზმები ემატება, როგორიცაა ,,სუბსიდირებული იპოთეკური სესხი“, ,,ბიზნეს უნივერსალი“ და ,,აგრო და ეკო-ტურიზმის მხარდაჭერა“.

სუბსიდირებული იპოთეკური სესხის პროგრამა ატარებს ერთჯერად ხასიათს და მასში მონაწილეობა ბენეფიციარს შეუძლია მხოლოდ ერთხელ, მის მიერ აღებული სესხის მოცულობის მიუხედავად. ეს შეზღუდვა არ ვრცელდება მრავალშვილიან ოჯახებზე - მათ შეეძლებათ მე-4 და მეტი შვილის გაჩენის შემთხვევაში ხელმეორედ ისარგებლონ პროგრამით და შესაბამისად, შეძლონ ახალი, მაქსიმუმ 200 000 ლარიანი სესხის აღება.

რაც შეეხება ,,ბიზნეს უნივერსალს“,  პროგრამის ფარგლებში სესხის მინიმალური მოცულობა შეადგენს 50 000 ლარს, ხოლო მაქსიმალური 10 000 000 ლარს. აღსანიშნავია, რომ სესხის მინიმუმ 50% უნდა იყოს მიმართული ძირითად და კაპიტალურ დანახარჯებზე, ხოლო არაუმეტეს 50%-ისა საბრუნავი საშუალებების შესაძენად.

დაახლოებით ანალოგიურია პირობები ,,ბიზნეს ექსპორტისა“ და ,,აგრო და ეკო ტურიზმის განვითარებისთვის“.  უკანასკნელ შემთხვევაში, როგორ სააგენტოში ,,აწარმოე საქართველოში“ განმარტავენ, ბენეფიციარებს ტურიზმის ეროვნული სააგენტო გაუწევს მარკეტინგულს მხარდაჭერას, კერძოდ მათ ეძლევათ საშუალება გაიარონ ადგილობრივი და საერთაშორისო ინფო-ტური; მიიღონ ხელშეწყობა პერსონალის გადამზადებაში და დაუფინანსდებათ ტურისტულ გამოფენებში მონაწილეობა. 

მარი ჩიტაია