„ახლად გახსნილ კაფეს, რომელიც ისედაც ჩაძირულია კორონავირუსის გამო 10 000 ლარს ჯარიმას, რომ უწერ არის არაადეკვატურობის პიკი. ეს არ არის მცირე ბიზნესის მხარდაჭერა, ეს არის ბიზნესის ჩაძირვა“, - ამის შესახებ კომერსანტს კაფე „თონეს“ თანამფლობელმა თაკო მახალდიანმა განუცხადა. ბიზნესმენი აცხადებს, რომ კორონავირუსის გავრცელების პრევენციისთვის დადგენილი ნორმების დარღვევისთვის გამოწერილ ჯარიმის გადახდას არ აპირებს:
„კანონი კანონია და თუ წერია, რომ სტიკერები უნდა გვქონოდა, გასაგებია, არ გვქონდა და უნდა დავჯარიმებულიყავით, მაგრამ ეს ჯარიმა უნდა იყოს ადეკვატური. თავს ვგრძნობთ ძალიან უსამართლო სიტუაციაში და არ ვიცი რისი იმედი უნდა მქონდეს. დაჯარიმების ერთ-ერთი მიზეზი იყო ის, რომ არ გვქონდა სტიკერი სადაც ეწერებოდა, რომ დეზობარიერს ფეხი უნდა დაადგან, მაშინ როდესაც დეზობარიერი კარებთან დევს ისე, რომ ფიზიკურად შეუძლებელია ფეხი არ დაადგა. კიდევ ერთი მიზეზი იყო ის, რომ ჭურჭლის სარეცხ მანქანასთან არ არის გაკრული მითითება, რა ტემპერატურაზე უნდა გაირეცხოს ჭურჭელი, მაშინ როდესაც ერთი ფუნქცია აქვს და რეცხავს 75 გრადუსს ზევით. ასევე ოქმში წერია, რომ შენიშნეს როგორ შემოდის ბართან ადამიანი და ვიღებთ შეკვეთას, მიუხედავად იმისა, რომ გვაქვს შეშვების უფლება, უსაფრთხების მიზნით არ ვუშვებთ შიგნით სტუმრებს, ეს შეგვიძლია დავუდასტუროთ ჩვენი კამერებით.სანამ დავიწყებდით მუშაობას სამჯერ გავუგზავნეთ მოთხოვნა, რათა მოსულიყვნენ ადგილზე, შევემოწმებინეთ და ეთქვათ ის მითითებები რომელიც აუცილებელი იყო ჩვენი შემდგომი მუშაობისთვის, მაგრამ პასუხი არცერთხელ მიგვიღია“, - განმარტვას თაკო მახალდიანი.
ჯარიმის გადახდას არ აპირებს არც სამაგიდო თამაშების კლუბის „წიბახას“ დამფუძნებელი გიგა წიბახაშვილი. მისი თქმით, საქართველოს მთავრობას ბიზნეს სუბიექტების დაჯარიმება თავიდანვე მიზნად ჰქონდა დასახული. როგორც წიბახაშვილი აცხადებს, გადასახდელი 10 000 ლარი შესაძლოა გაკოტრების საფასური გახდეს.
„დავალება ჰქონდათ ასეთი, რის გამოც მიზეზს ეძებდნენ და იპოვეს. გვკითხეს ჩავუტარეთ თუ არა თანამშრომლებს ტრენინგი კორანავირუსის თაობაზე, ვუთხარით რომ ჩავუტარეთ, მოგვთხოვეს დამადასტურებელი დოკუმენტი, რომელზეც უბრალოდ თანამშრომლების ხელმოწერა იქნებოდა. ამ დოკუმენტის ქონის ვალდებულება არ გვქონდა, გადაწყვიტეს, რომ ტრეინინგი არ ჩაგვიტარებია. კიდევ ერთი მიზეზი იყო სტიკერი, რომელზეც ეწერებოდა რომ დეზობარიერს უნდა დააბიჯო, დღეს, რომ მივედი ჯარიმის ჩასაბარებლად თვითონ ჯანდაცვის სამინისტროს, რომელიც მე მაჯარიმებს ეს სტიკერი არ ჰქონდა. პირდაპირ გაწერილი არსად არაა, რომ ესეთი სტიკერი უნდა მქონდეს. რა თქმა უნდა ჯარიმის გადახდას არ ვაპირებთ, ამ ეტაპზე ვგეგმავთ რომ გავასაჩივროთ.
რეალურად ძალიან ცუდ მდგომარეობაში ვართ რადგან, ორი თვე არ გვიმუშავია, რა დროსაც ხარჯები გვქონდა, ჩვენი ბიზნესი ისედაც გაკოტრებასთან ახლოს იყო და ეს 10 000 ლარი შეიძლება გაკოტრების საფასური იყოს. სანამ გავიხსნებოდით უნდა მოსულიყვნენ და შევემოწმებინეთ,რჩევა მოეცათ. ეს არ მოხდა, პირდაპირ მოვიდნენ, რომ დავეჯარიმებინეთ.“, -აცხადებს გიგა წიბახაშვილი.
შეგახსენებთ, რომ საქართველოს ჯანდაცვის სამინისტროს შრომის პირობების ინსპექტირების დეპარტამენტმა გასული კვირის ბოლოს კვების 26 ობიექტი შეამოწმა და 16 მათგანი კორონავირუსის გავრცელების პრევენციისთვის დადგენილი ნორმების დარღვევისთვის 10 000-10 000 ლარით დააჯარიმა.
ბაჩო ადამია