თბილისის მასშტაბით, ბინის ქირა ერთბაშად 100 დოლარით და მეტადაც გაძვირდა. ამის მიზეზად უძრავი ქონების სააგენტოებში მოთხოვნის ზრდას ასახელებენ, რაც თავის მხრივ, საქართველოში უცხო ქვეყნების მოქალაქეების შემოსვლას უკავშირდება.

კომპანია ,,კიბეს“ ხელმძღვანელი ნელი გოგუაძე ,,კომერსანტთან“ ამბობს, რომ გასაქირავებელი ბინების ფასი საშუალოდ 500 დოლარიდან იწყება, ხოლო ძირითადად ახალაშენებულ კორპუსებში 3 000 დოლარს აღწევს.

მიიღე ინფორმაცია უფრო სწრაფად „კომერსანტის“  Telegram-ზე.

,,სიტუაცია მოულოდნელად შეიცვალა, ფასების ზრდის ტენდენცია ნამდვილად არის, ეს ძირითადად ეხება შედარებით ნაკლებფასიან ქირებს. 1500 დოლარსა და ზევით რა ფასებშიც ქირავდებოდა ბინები, შენარჩუნდა, მაგრამ 300 და 400 დოლარად საცხოვრებელი ფართები უკვე არ ქირავდება. მათი ფასი მოულოდნელად 500-600 დოლარი გახდა. ცვლილება  მოთხოვნის ზრდას უკავშირდება. ძირითადად არიან უკრაინელები და ბელარუსები, რუსები - ნაკლებად. გარდა ამისა, უფრო 6-7 თვის და მეტი ვადით ცდილობენ გაქირავებას.  უბნების მიხედვით საბურთალო-ვაკე-მთაწმინდა ყოველთვის მაღალი ფასით გამოირჩეოდა, მაგრამ ახლა ,,იაფი ბინა“ არასად არ არის, ფასები ყველა უბანში გაზრდილია. ტარიფები მდებარეობის და კეთილმოწყობის მიხედვით მატულობს. ყველაზე მეტად მოთხოვნა 1000 დოლარამდე ღირებულების ბინებზეა“, - ამბობს ნელი გოგუაძე.

მისი თქმით, ტენდენცია სავარაუდოდ დიდხანს არ გაგრძელდება და როგორც კი პიკი გადაივლის, ფასი თანდათან დაიწევს.

,,არასტაბილური სიტუაციაა და ალბათ ცოტა ხანში გამოსწორდება. ბუმი პიკს ერთ თვეში აღწევს ხოლმე და მერე ჩაწყნარდება. ყველამ იცის, რა ღირს ბინა რეალურად, ბოლოს და ბოლოს მიწოდებაც აღარ იქნება და სიტუაცია მეტნაკლებად დალაგდება. ყველაფერი მაინც ადამიანზეა დამოკიდებული, ბევრი არაკეთილსინდისიერად მოიქცა და მდგმურები გაუშვა ბინიდან ან გაუძვირა, მაგრამ არიანი ისეთებიც, რომლებსაც ფასი არ შეუცვლიათ“, - ამბობს ნელი გოგუაძე ,,კომერსანტთან“.

,,თიბისი კაპიტალის“ კვლევის მიხედვით, უძრავი ქონების ბაზარს ისედაც ჰქონდა მზარდი ტემპი, რაც განსაკუთრებით გაიზარდა  ფასის ნაწილში, – თებერვალსა და მარტის პირველ რიცხვებში. კერძოდ,  „უძრავი ქონების ბაზარზე ტრანზაქციები  გაზრდილია 19%-ით პრეპანდემიერ პერიოდთან 2019 წელთან  შედარებით; უძრავი ქონების ღირებულება 10%-ით, ხოლო ქირის ფასი 27%-ით გაიზარდა.

მარი ჩიტაია