თბილისის ახალი ავტობუსები დაზღვეული არ არის. ამის მიზეზად თბილისის სატრანსპორტო კომპანიაში ამ ტიპის დაზღვევის კოლოსალური საფასური და თვითონ სადაზღვევო ბიზნესის მხრიდან დაინტერესების არარსებობა იიჩნევა, რის გამოც ამ ხნის განმავლობაში სატრანსპორტო კომპანიამ ვერც ერთ სადაზღვევო კომპანიასთან ვერ მიაღწია შეთანხმებას.  

მიიღე ინფორმაცია უფრო სწრაფად ჩვენს Telegram-ზე.

თბილისის სატრანსპორტო კომპანიის წარმომადგენლის ლელა სეთურიძის თქმით, დაზღვევის საკითხი ამ ეტაპზე არ განიხილება, თუმცა გასულ პერიოდში ამაზე სისტემატურად მიმდინარეობდა მუშაობა, რამაც შედეგი ვერ გამოიღო.

,,ამ ეტაპისთვის ჩვენი ავტობუსები დაზღვეული არ არის, რასაც  ორი მიზეზი აქვს: სერვისით თვითონ კომპანიები არ ინტერესდებიან და მეორე, არარეალურ, კოლოსალურ თანხებზეა საუბარი, რის გადახდაც კომპანიისთვის პრობლემა ნამდვილად არის.  ჩვენ შემთხვევაში, მოქმედებს ,,მესამე პირის დაზღვევა“, ამ ნაწილში  ,,ნიუ ვიჟენის“  მომსახურებით ვსარგებლობთ. ჯერჯერობით დაზღვევის საკითხი არ განიხილება, თუმცა ამასთან დაკავშირებით ვმუშაობდით სისტემატურად და საკითხს მომავალშიც მივუბრუნდებით. მთავარია, ტარიფი იყოს გონივრული, რომელიც  ჩვენთვის და ბიზნესისთვისაც მისაღები იქნება“,  - ამბობს ლელა სეთურიძე ,,კომერსანტთან“.

 საავტომობილო სფეროს სპეციალისტების აზრით, საზოგადოებრივი ტრანსპორტი ყველა ნორმალურ ქვეყანაში დაზღვეულია და ეს მნიშვნელოვანია დედაქალაქისთვის, რათა ავტოსაგზაო შემთხვევების რისკი მაქსიმალურად იყოს გათვალისწინებული.

„პარტნიორობა საგზაო უსაფრთხოებისთვის“  გამგეობის თავმჯდომარე გელა კვაშილავა აცხადებს, რომ საზოგადოებრივი ტრანსპორტი ვერ იქნება უსაფრთო, სანამ დაზღვევის კომპონენტი არ ჩაერთვება, რაც რისკის პრევენციის მთავარი პირობაა.

,,საზოგადოებრივი ტრანსპორტის უსაფრთხოებაზე ზრუნვა სწორედ დაზღვევით უნდა იწყებოდეს. ამ რისკის დაზღვევა აუცილებელია. როგორც წესი, ამ შემთხვევაში უფრო ოპერატიულად გვარდება პრობლემა, სასამართლოც ნაკლებად ერევა და უფრო მცირე ფინანსური რესურსი იხარჯება.  იმის გამო, რომ ტრანსპორტი არ არის დაზღვეული, ავტოსაგზაო შემთხვევებისას ხარჯი ხშირად  მძღოლზე გადადის, დროში იწელება ეს პროცესი და რიგი პრობლემები ახლავს, რაც ძალიან დიდ დისკომფორტს ქმნის. მესმის, საზოგადოებრივი ტრანსპორტის დაზღვევა ძვირია, მაგრამ ხარჯი აუცილებლად უნდა გაიღოს კომპანიამ. გარდა ამისა, დაზღვევას აქვს მეორე მხარეც - შემოსული თანხით საგზაო უსაფრთხოების პროექტები ფინანსდება, რაშიც შემოსავლის 3-5%  იხარჯება. ასეა ყველა ნორმალურ ქვეყანაში, მათ შორის რეგიონის ქვეყნებში. საქართველოში აქამდე რატომ ვერ მოხერხდა, ჩემთვის გაუგებარია“, - აცხადებს გელა კვაშილავა ,,კომერსანტთან“.

ცნობისთვის,  ავტოსაგზაო შემთხვევა მოხდა ორშაბათს, 21 მარტს, თბილისში, მარჯვენა სანაპიროზე ერთმანეთს სამგზავრო ავტობუსი და ორი მსუბუქი მანქანა შეეჯახა. 

შემთხვევის შედეგად 2 პირი დაშავდა. ავარიას მსხვერპლი არ მოჰყოლია. 

შინაგან საქმეთა სამინისტროს ინფორმაციით,  მომხდარზე გამოძიება 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

მარი ჩიტაია